Vísitölufjölskyldan

svarthvítir strákar

2011-10-06T10:33:00.001+01:00

Runaway train

2011-09-28T11:07:00.000+01:00

Minningar maður.. Ég horfði ansi oft á þetta myndband á MTV í "gamla daga"..

.. fékk örugglega oft kökk í hálsinn því enn þann dag í dag fæ ég gæsahúð þegar ég hlusta á þetta lag.

e.s: kökkur er ógeðslegt orð.

22.09.2011

2011-09-22T12:08:00.000+01:00

Alveg gleymdi ég að vara alla landsmenn við svolitlu í endann júní.

Haldið þið að ég hafi ekki bara skellt mér í eitt stykki bílpróf.

Ég er bara farin að "krúsa" um göturnar eins og mér sé borgað fyrir það.

Skulda reyndar svona milljón skutl.. Hu humm.

Allir fjölskyldumeðlimir mínir hafa setið með mér í bíl..
Nema móðir mín, hún ætlar aldrei að fá far hjá mér.

Takk mamma.

Gjörið svo vel .. Bítlarnir ætla að enda þetta fyrir mig..

Þessir þrír drengir..

2011-08-28T18:49:00.000+01:00

.. eru klárlega í uppáhaldi hjá mér.

Brjálæðislega mikið skemmtilegt framundan næstu vikur og mánuði.

áfram breytingar og áfram ég.

Ellen best í heimi ..

2011-05-21T23:53:00.000+01:00

Ég horfi oft á spjallþætti og finnst eins og Oprah Winfrey sé ein af mínum bestu vinkonum.

Jay Leno er leiðinlegur - David Letterman ennþá leiðinlegri.

Skil ekki af hverju í fjandanum, afskakið orðbragðið, að engin íslensk sjónvarpsstöð sýni ekki spjallþáttinn hennar Ellen Degeneres.
Hún er svo dásamlega fyndin að ég á ekki einu sinni til orð til að lýsa því yfir hvað mér finnst hún frábær.

Íslenskir spjallþættir eru náttúrulega bara hroðalegir, hrikalegir og kjánalegir.

Eiríkur fyrrverandi ritstjóri Séð og Heyrt var með spjallþáttinn Eiríkur - ég missti sko ekki af einum einasta þætti en vissi sjaldan um hvað var verið að ræða.. ég var líka örugglega bara 8 ára eða eitthvað.

Gísli Marteinn - klappaði alltaf fyrir gestunum sínum því það voru engir áhorfendur í sal.

Á tali hjá Hemma Gunn - þetta var náttúrulega skemmtiþáttur og í minningunni var hann góður reyndar.

Logi í Beinni reynir bara að finna til gamlar klippur af viðmælandanum sínum og svo rakkar hann viðmælandann niður í beinni útsendingu (reyndar er hann ekkert alltaf í beinni útsendingu.)

Nenni ekki að rifja upp fleiri gamla íslenska spjallþætti.

Ég vil bara fá spjallþáttinn Ellen inn í mína stofu.

Ég fæ aldrei, aldrei leið á :

2011-05-06T10:30:00.000+01:00

elsku Sufjan Stevens.

39 ára gömul húfa..

2011-05-04T17:28:00.000+01:00

Orri og Mamm´ans árið 2010

Úlfar og Mamm´ans árið 2009

...

Það eru nokkrar flíkur sem ég á og strákarnir mínir sem ég ætla aldrei að henda eða gefa.
Svo eru t.d. nokkrar flíkur sem mig langar til að brenna á báli ...

... eða ætti kannski frekar henda í Rauða krossinn.

Undur og stórmerki

2011-05-03T11:23:00.000+01:00

Ég er hætt með facebook. Allavega í óákveðinn tíma.

...

Við Úlfar horfðum um daginn á American Idol sem er í uppáhaldi þessa daganna.

Hann er á þessum aldri sem hann spyr um bókstaflega allt saman.

"Hvað heitir þessi - hvernig eru þessar buxur á litinn - afhverju eru allir að klappa..?"

Sem er bara krúttlegt..

En ég veinaði úr hlátri þegar krakkinn spurði mig hvað hin konan í dómnefndinni heitir.. og benti á Steven Tyler.. hahaha.

Útvarp Hjallabraut

2011-03-30T10:41:00.000+01:00

Við fjárfestum í litlu útvarpi á mánudaginn. Sem er algjör snilld

Er einn helsti aðdáandi þáttarins Virkir morgnar á Rás 2 - Hlustaði stundum á útvarpið í tölvunni en gleymdi því fáránlega oft. Það er því afar einfalt að ýta á einn takka og þá er fólk komið í heimsókn í eldhúsið mitt.

Sem sagt, þá er ég búin að hlusta á útvarpið okkar fallega í 2 daga.
Vonandi gleymi ég síðan ekki að ég eigi útvarp.

...

Við Orri erum veik í dag .. ég var búin að plana að fara í göngutúr aldarinnar. Svekkjandi. Orri er reyndar mun slappari heldur en mamma hans.

Við slökktum aðeins á útvarpinu sem var búið að hljóma hér í morgun og erum búin að búa til okkar eigin "útvarpsstöð" - Reyndar eru bara tveir hlustendur eða þrír ef ég tel kisa með.

Þegar maður er myglaður og með 39°C stiga hita þá er ógeðslega gaman að hlusta á þessi lög :

og höndinni dillað upp og niður ala Amma Sigrún

Að rækta vini og fjölskyldu

2011-03-22T00:07:00.000Z

(uppáhalds myndin mín)
Elsku yndislega Sigurfljóð amma mín og Arnór Alex litli engillinn minn

Var að skoða gamlar færslur frá mér , hér á þessari síðu.. og einnig frá blog.central.is/stelpanmedharid og svo stelpanmedharid.blogspot.com -

Mér finnst pínu fyndið að hafa verið með þrjár bloggsíður - byrjaði sem sagt að blogga árið 2004.

Þessi færsla er ein af uppáhalds færslunum mínum.

"Sunnudagur til sælu -

Við Hildur systir kíktum í heimsókn til ömmu okkar í dag. Ræddum um daginn og veginn, fengum okkur ýmis góðgæti og lásum saman ljóð eftir Davíð Stefánsson frá Fagraskógi.

Amma mín, Sigurfljóð Jónsdóttir, sem verður níræð í sumar tók sig einnig til og flutti Gunnarshólma eftir Jónas Hallgrímsson fyrir okkur í einum rikk. Við systurnar urðum agndofa og klöppuðum fyrir henni líkt og við værum staddar á frumsýningu á leikriti aldarinnar.

Amma mín er dásamleg, mér þykir svo vænt um hana.

Gunnarshólmi

Skein yfir landi sól á sumarvegi, og silfurbláan Eyjafjallatind gullrauðum loga glæsti seint á degi. Við austur gnæfir sú hin mikla mynd hátt yfir sveit, og höfði björtu svalar í himinblámans fagurtærri lind. Beljandi foss við hamrabúann hjalar á hengiflugi undir jökulrótum, þar sem að gullið geyma Frosti og Fjalar. En hinum megin föstum standa fótum, blásvörtum feldi búin, Tindafjöll og grænu belti gyrð á dalamótum. Með hjálminn skyggnda, hvítri líkan mjöll, horfa þau yfir heiðarvötnin bláu, sem falla niður fagran Rangárvöll, þar sem að una byggðarbýlin smáu, dreifð yfir blómguð tún og grænar grundir. Við norður rísa Heklu tindar háu. Svell er á gnípu, eldur geisar undir. Í ógna djúpi, hörðum vafin dróma, skelfing og dauði dvelja langar stundir. En spegilskyggnd í háu lofti ljóma hrafntinnuþökin yfir svörtum sal. Þaðan má líta sælan sveitablóma, því Markarfljót í fögrum skógardal dunar á eyrum. Breiða þekur bakka fullgróinn akur, fagurst engjaval þaðan af breiðir hátt í hlíðarslakka glitaða blæju, gróna blómum smám. Klógulir ernir yfir veiði hlakka, því fiskar vaka þar í öllum ám. Blikar í lofti birkiþrasta sveimur, og skógar glymja, skreyttir reynitrjám. Þá er til ferðar fákum snúið tveimur, úr rausnargarði háum undir Hlíð, þangað sem heyrist öldufalla eimur, því atgang þann ei hefta veður blíð, sem voldug reisir Rán á Eyjasandi, þar sem hún heyir heimsins langa stríð. Um trausta strengi liggur fyrir landi borðfögur skeið, með bundin segl við rá, skínandi trjóna gín mót sjávar grandi. Þar eiga tignir tveir að flytjast á, bræður, af fögrum fósturjarðar ströndum og langa stund ei litið aftur fá, fjarlægum ala aldur sinn í löndum, útlagar verða, vinar augum fjær. Svo hafa forlög fært þeim dóm að höndum. Nú er á brautu borinn vigur skær frá Hlíðarenda hám, því Gunnar ríður atgeirnum beitta búinn. Honum nær dreyrrauðum hesti hleypir gumi, fríður og bláu saxi gyrður, yfir grund. Þar mátti kenna Kolskegg allur lýður. Svo fara báðir bræður enn um stund. Skeiðfráir jóar hverfa fram að fljóti. Kolskeggur starir út á Eyjasund, en Gunnar horfir hlíðarbrekku móti. Hræðist þá ekki frægðarhetjan góða óvina fjöld, þó hörðum dauða hóti. "Sá ég ei fyrr svo fagran jarðargróða, fénaður dreifir sér um græna haga, við bleikan akur rósin blikar rjóða. Hér vil eg una ævi minnar daga alla, sem guð mér sendir. Farðu vel, bróðir og vinur!" - Svo er Gunnars saga. - - - Því Gunnar vildi heldur bíða hel en horfinn vera fósturjarðar ströndum. Grimmlegir fjendur, flárri studdir vél, fjötruðu góðan dreng í heljar böndum. Hugljúfa samt ég sögu Gunnar tel, þar sem ég undrast enn á köldum söndum lágan að sigra ógnabylgju ólma algrænu skrauti prýddan Gunnarshólma. Þar sem að áður akrar huldu völl, ólgandi Þverá veltur yfir sanda. Sólroðin líta enn hin öldnu fjöll árstrauminn harða fögrum dali granda. Flúinn er dvergur, dáin hamratröll, dauft er í sveitum, hnípin þjóð í vanda. En lágum hlífir hulinn verndarkraftur, hólmanum, þar sem Gunnar sneri aftur.

Jónas Hallgrímsson

Pant verða eins og amma mín þegar ég verð stór."

Skrítið að eiga uppáhalds færslu .. en þessi dagur sem ég skrifaði um er einn af mínum uppáhalds dögum.

Þegar Amma mín var ekki bara amman sem maður fór í heimsókn til, fékk pönnukökur og kaffi eða mjólk ... heldur þegar ég leit fáránlega mikið upp til ömmu minnar og fannst hún vera kvenhetja.

Ég sé svo engan veginn eftir þeim tíma, þegar ég átti að vera að læra á bókhlöðunni .. eða í tíma í íslenskunni og eyddi þeim tíma frekar með ömmu minni á Lindargötunni.

Við ræddum um pólitík, tilhugalífið , glugguðum í ljóðasafninu hennar og eða ræddum um stríðsárin.

Amma mín er best og ég kynntist henni upp á nýtt.

Væmin.. já kannski. En ég er alltaf eða mjög oft með samviskubit yfir því hvað ég er léleg að heimsækja elsku yndislegu ömmu mína.

Ræktum fjölskyldu og vini .. þau eru líf okkar og yndi.

draumaíbúðin mín

2011-03-18T08:58:00.000Z

Ég á nokkur áhugamál og eitt þeirra er að hanga á fasteignasíðunni - www.fasteignir.is

Þetta áhugamál er eiginlega sjúklegt .. fer a.m.k. 1 á dag inn á hana. Og aldrei finn ég draumaíbúðina mína.

Hvar ertu elskulega draumaíbúð ..? Risa þvottahús - yndislega fallegt eldhús - með fullt af herbergjum - temmalega huggulegri stofu - svölum sem sólin er allan liðlangan daginn - glæsilegum garði sem hægt er að skella upp knattleikjum og grillpartíum.

Hún er auðvitað í Hafnarfirðinum fagra .. en ég bara finn hana ekki.

besta snakkið

2011-03-15T16:25:00.000Z

er klárlega harðfiskur.

með smá dassi af smjörva ofan á.

mmmm.

Mottumars

2011-03-05T17:36:00.001Z

Úlfar og Orri

2011-03-01T17:00:00.000Z

Það eru 18 mánuðir á milli strákanna minna.

Úlfar er stundum ekki alveg að gúddera það að Orri litli sé að leika með dótið hans og á þá stundum til að ýta bróður sínum eða hrinda.

Hér snýst dæmið við.. Orri var að leika sér með bíl og Úlfar rífur hann af kappanum.

Sjá myndband.. :

"slepptu mér"

Elsku dúllurnar mínar..

Það er fjör á bænum þegar maður á svona litla sæta stráka.. :)

Myndir

2011-02-23T10:29:00.000Z

Orri að sýna glæsilega frekjuskarðið sitt.

Úlfar alveg búinn "áðí" eftir jólastússið

Bubbi snjókall og Úlfar sáttur með nýja vin sinn

"Nei mamma ég vil ekki fara að sofa"

Ég fékk pínu ponsu sjokk þegar ég uppgötvaði hvað ég á eftir að framkalla soldið margar myndir og ég eins og bjáni á ekki til neitt "back up".

Nr. 1 - henda þessum 3000 myndum sem ég á á flakkara (hu humm, kannski að kaupa flakkara)
Nr. 2 - framkalla myndir ekki seinna en á föstudaginn.

Monty Python hópurinn

2011-02-19T15:54:00.000Z

eru svo sannarlega í miklu uppáhaldi .. Þeir eru svo ógeðslega fyndnir.

Lögin þeirra eru einnig dásamleg .. Ég kemst alltaf í fáránlega góðan fíling þegar ég set MP í gang. Þessi lög hérna að neðan eru í miklu uppáhaldi.

Finland

Lumber jack song

Every sperm is sacred

ok..

2011-02-09T22:23:00.000Z

nú verð ég að fara að fjárfesta í gardínum..

Er byrjuð að stunda leikfimi á fullu (ok. þegar ég segi fullu þá hef ég gert þetta 3x) heima hjá mér í hádeginu í stofunni..
Rétt áður en nágrannar byrja í sjónvarpinu þá tek ég frjálsa æfingu ala Þórunn.

Bamm - finn nokkur Shakiru myndbönd á youtube og blasta þeim í gang.

Úff. þetta er svo fáránlega gaman. Ég er náttúrulega meistari meistaranna að skemmta sjálfri mér og Orri litli yndislegi var vakandi í hádeginu í dag og varð vitni að leikfimiruglinu í mömmu sinni og krakkinn án djóks grenjaði úr hlátri.

Orri heppin að eiga svona furðulega mömmu.

Allavega .. í miðri æfingu þá kom ruslakall niður tröppurnar og ég rétt náði að henda mér í gólfið áður en hann sá trylltu konuna í allt of litlum hjólabuxum og í króatískum landsliðsbúningi vera kýla og taka "tæ bó" spörk í loftið.

... ætla að fara að fjárfesta í korti í HRESS.. og mæta í alvöru ZUMBA tíma hjá Allý vinkonu minni.

Eða bara kaupa gardínur,

Ég fann :

2011-02-02T13:46:00.000Z

Skytturnar þrjár

þessa mynd hérna að ofan af okkur systrunum í gær þegar ég kíkti í heimsókn til ömmu minnar. (Ég veit ógeðslega léleg gæði á myndinni.)
Og ég gat ekki hætt að hlægja. - Ef þú rýnir aðeins í myndina þá sérðu þrjár glæsipíur.
Eins og við erum nú pínu svipaðar í dag þá er þessi mynd alveg með þeim fyndnari.

Amma mín skildi ekki afhverju ég flissaði næstum því úr mér lungunum.

En úff hvað það er nú gaman að hlægja.

Elsku litlu rostungarnir mínir

2011-01-30T23:31:00.004Z

7 mánuðir eru liðnir síðan Orri kom í heiminn.

4 tennur mættar á svæðið og um leið eitursvalt frekjuskarð.

...

Það eru 25 mánuðir liðnir síðan Úlfar kom í heiminn.

20 tennur mættar á svæðið og frekjuskarðið hans krúttlega er horfið.

Hæ þú .. já þú.

2011-01-23T00:58:00.000Z

Er komin aftur.. ég dett einhvern veginn alltaf úr blogggír (er það orð?)

Flaming lips ætla að halda uppi blogginu mínu þangað til á mánudag/ þriðjudag.

Þá kemur krúttlegur pistill ala Þórunn Þórarins. *Lofa*

Má bjóða þér í pönnsur ..?

2011-01-05T01:16:00.000Z

Þá er það opinbert .. ég er orðin gömul. Hvar eru rúllurnar hennar ömmu gömlu..?

Ég dró sem sagt hvítasta hár í heiminum úr höfðinu ár mér þann 2. janúar.

2011 byrjar því ekki vel - allt átti að vera svo hreint, fínt og dúllulegt.

Vonandi koma þá ekki 14 stk í viðbót.

Sufjan Stevens - Sister Winter

2010-12-16T20:15:00.001Z

Einn tveir og hlusta.

ó svo dásamlegt.

The Yvestown blog

2010-12-14T23:53:00.000Z

Er blogg sem er búið að vera í miklu uppáhaldi hjá mér. Ég hef ekki viljað sýna neinum síðuna því mér finnst hún svo dásamleg og vildi eiga hana alveg sjálf. (eigingjörn, uu já)

Uppgötvaði hana fyrir svona 1 1/2 ári og elska hana.

Svo kannski hafa margir skoðað hana þúsund x.

En ég mæli allavega með að þið kíkið á hana.

Hún er agalega kjút.

http://www.yvestown.com/

Hitt og þetta

2010-12-11T16:07:00.000Z

UHU- límið er þvílíkt undur.

Ég er að dunda mér þessa daganna að líma hitt og þetta sem Úlfar minn hefur látið detta í gólfið síðustu vikur og mánuði.
Reyndar hefur Kristmundur örugglega brotið eitthvað af þessu stöffi.

Hann tók sig líka til í morgun og sauð/steikti eldhúsklukkuna mína (sem ég keypti í RL- vöruhúsi um árið) á brauðristinni okkar. Hún lítur ekkert sérstaklega vel út svona bráðnuð.

...

Ég á afmæli bráðum og jólin eru að detta í hús.
Það sem mig vantar og langar í er meðal annars þetta :

Einhverja brjálaða rykugu

Djúpa og góða pönnu

Unaðslegt ilmvatn

og huggulegan teketil..

...

Vaknaði dálítið seint í morgun og er ekki frá því að það hafi verið smá Skröggur (Scrooge ) í mér fyrir hádegi .. það breyttist pínulítið þegar móðir mín kom færandi hendi með gamalt jóladót sem ég hef sankað að mér síðustu ár.

Smashing pumkins ætla að enda þennan póst í dag.

Hæfileikaríkt fólk

2010-12-05T14:03:00.000Z

Það er svo mikið af hæfileikaríku fólki í kringum mig og ég elska það..

Hér sjáið þið mynd sem ég stal frá Allý vinkonu minni.

Þetta átfitt hérna að ofan er eftir Allý stórvinkonu mína og sýndi hún meðal annars á Tískusýningu Unglistar og Tækniskólans fyrir rúmum 2 vikum síðan .. Ótrúlega flott hjá henni.

Það er svo stutt síðan við vorum að flissa saman fyrir lokapróf í þýsku.. fyrir hva.. hóst hóst fyrir 6 árum síðan.

Fylgist með Allý kæra fólk.. Hönnuður framtíðarinnar.. :)

Einn tveir, einn tveir..

2010-12-04T15:18:00.000Z

Hljómsveitin Fleet Foxes eru í miklu uppáhaldi hjá mér. Fyrir akkúrat 2 árum eða þegar Úlfar kom í heiminn þá hlustuðum við Krissi á þessa plötu á Landspítalanum.
Fer nú ekkert nánar út í það.

En það er svo skrítið að þegar ég spila lögin þeirra þá hrannast svo mikið af minningum upp (sorry ég er smá væmin núna) og lögin verða einhvern veginn mega persónuleg.

Hér er lagið White Winter Hymnal

Jæja en að öðru, þið krúttlega fólk sem les þessa fréttasíðu..
Hvaða smákökur eru möst að baka fyrir jólin..?

Gjafakort og íþróttir

2010-11-30T23:12:00.000Z

Er ekki verið að grilla í manni með öll þessi gjafakort sem fyrirtæki eru að auglýsa fyrir jólin.

Er að pæla í að gefa mömmu og pabba gjafakort í Bónus og svo systkinum mínum gjafakort á Metro.

Glæsilegar þessar.

Gjafakort geta verið sniðug til að gefa fólki sem á allt .. en ef einhver myndi gefa mér gjafakort á Metro þá veit ekki hvort ég myndi gráta eða hlægja.

"Gleðileg jól Þórunn, þú ert feit fáðu þér hamborgara milli jóla og nýjárs.
Kveðja þinn versti óvinur."

Krúttlegustu svín í heiminum.
Pant eignast eitt svona sem stækkar ekki neitt.

...

Veit ekki hvað hefur komið fyrir höfuðið á mér en ég hef ekki tíma né nenni að horfa á knattleiki þessa daganna. Ég gef það út að ég sé Liverpool aðdáandi en ég þekki kannski þrjá í liðinu. Kannski fínt að ég sinni börnum og buru í staðinn fyrir að glápa á knattleiki hægri vinstri um helgar.

Tapaði svo veðmáli við Kristmund á sunnudeginum .. ég var alveg sjor á því að Liverpool myndi vinna hið glæsilega lið Tottenham.

pffff ég skulda - 100 magaæfingar og út að borða. -

Verð að fara að hætta þessum veðmálum .. held alltaf að ég vinni öll veðmál.
Svo er ég líka alltaf jafn hissa þegar ég vinn ekki í Lottó eða í happadrættum.

yfir og út
ÞÞ

"how proud you must be."

2010-11-26T10:05:00.000Z

Það eru nokkrar kvikmyndir sem eru í miklu uppáhaldi hjá mér. Þessi er allavega í top 5.

Kvikmyndin Parenthood. - Segi það og skrifa það, það er ekki hægt að fá leið á þessari mynd.

Hey ´all.

2010-11-23T15:21:00.000Z

Uppgötvaði fyrir stuttu hvað sjónvarpstækið gefur frá sér mikið áreiti.

Þegar maður slekkur á því þá finnur maður einhvern innri frið. - Hugsa síðan oft um að ég ætti að vera duglegri að spila tónlist í staðinn fyrir að vera með sjónvarpið í gangi og enginn kannski að horfa á það.

Talandi um sjónvarp þá horfi ég stundum á sjónvarpsstöðina Style.
Skammast mín pínu fyrir að horfa á hana. Þarna eru alveg hrikalegir þættir sem ég slysast stundum oft að horfa á.

Allaveganna þá lærði ég alveg heilan helling í dag á þessari stöð.

Oft kaupir maður eggjabaka út í búð og treður svo eggjunum inn í ísskápinn. Við erum allavega með svona sér eggjahillu inni í okkar ísskáp. Svo standa greyið eggin þarna heillengi og oft veit ég ekki hvort þau séu í lagi eður ei.

Ef þú lendir í svona svaðalegu ástandi þá geturu fyllt skál af vatni og sett egg ofan í skálina. Ef að eggið flýtur þá er það ónýtt.. Ta taaaaa.

Furðulegt barn part 1

2010-11-18T13:25:00.001Z

Ég held rosa oft að ég hafi verið frekar furðulegt barn. Var alveg fáránlega feimin, kunni ekki að reima fyrr en ég var að ég held 10 ára og lærði örugglega á venjulega klukku þegar ég var nýbyrjuð í framhaldsskóla.

Þegar ég átti að mæta í skólann þá sendi mamma mig svona 30 mín fyrr (ég er svona 5 mín að ganga þennan spöl í dag) því í fyrsta lagi þá var ég svo lítil og með ógeðslega þunga tösku á bakinu og tók lítil skref og í öðru lagi þá fannst mér allt svo merkilegt á leiðinni í skólann. Safnaði hinu og þessu og mamma átti oft í erfiðleikum með að hlægja ekki að barninu sínu þegar hún var að þrífa úlpuna mína því þar var steinasafnið mitt í leynivasanum og svo náði ég meira að segja að troða rakettuprikum í vasana.

Steinasafnið mitt var svipað þessum steinum hér að ofan.
.. án djóks, ég átti keppnis steinasafn.

Ég er svo heppin að vera með gott minni. Mér finnst það kostur en stundum er það ókostur, get t.d verið alveg óttalega langrækin. Ég man t.d. eftir hugsunum mínum þegar ég var að tölta eitthvað alein.

Ímyndaði mér oft að göturnar væru gerðar úr lakkrís, blómin og grasið væri úr hlaupi o.s.frv.

Ég fylgist núna oft með Úlfari syni mínum og finnst fyndið hvað hann er uppgötva mikið og finnst hlutirnir vera einstaklega spennandi - örugglega ógeðslega gaman að uppgötva nýja hluti á hverjum degi.

Svo er krakkinn með húmor fyrir allan peninginn enda á hann líka fáránlega fyndna foreldra.

Flaming lips ætla að slútta þessari færslu fyrir mig:

ÝTIÐ HÉR

****

2010-11-15T00:15:00.000Z

Ég ætlaði að skrifa pistil um það sem fer í taugarnar á mér en ákvað frekar að vera ekki að opinbera það á alnetinu, verðið bara að sætta ykkur við fjölskyldupistil.

Ég er svo heppin að vera umvafin strákum alla daga.

Úlfar eldri yndislegi sonur minn kemur með gullkorn á hverjum degi.

Í gærmorgun, ákvað ég að fara með litla sílið í íþróttaskóla FH .. klæddi hann í þæginleg föt og greiddi svo kappanum með greiðu. Úlfar horfði á mig með fallegu kringlóttu augunum sínum og spurði mig svo:

"Úlfar fara í afmæli..?"

Hahaha.. ég greiði honum nefnilega oftast með greiðu þegar við erum að fara í boð, fékk samt svona smá í magann, - Herre guð greiði ég barninu aldrei..

Bræðurnir á Brautinni ógreiddir.

Úlfar verður tveggja ára þann 27. nóvember og er barnið búið að spyrja okkur foreldrana nokkuð oft hvenær hann eigi eiginlega afmæli.

Í kvöld ræddi ég við hann um afmælið hans og hvernig köku ég ætti að baka fyrir hann. Hann hafði enga trú á mömmu sinni og bað mig vinsamlegast um að kaupa Dóru-köku eða Eðluköku.

Úlfar og Orri með vinum sínum þeim Mikka og Guffa

Draumalandið

2010-11-11T09:21:00.000Z

Ég hef aldrei átt erfitt með að sofna á kvöldin. Hef oftast bara hent mér upp í rúm, beint á mallakút, knúsa koddann og þá er ég sofnuð.

Undanfarna daga þá hef ég ekki getað sofnað. Einhverjar áhyggjur kannski að poppa upp þegar ég leggst niður. "Æji gleymdi að hringja í XXX eða ná í ákveðna pappíra,"

Allaveganna þá var ég andvaka í gærkvöldi. Var búin að velta mér fram og til baka og hugsaði svo með mér; "Nei andskotinn ég er andvaka." Og hvaða lag haldið þið að ég hafi byrjað að raula.

Nú já einmitt júróvísjón lagið hennar Guðrúnar Árnýar - ANDVAKA. Almáttugur hjálpi mér. Og ég sem kann bara tvær línur.

Hef ekkert á móti Guðrúnu Árný, fín söngkona en þetta lag er kannski ekki alveg að gera sig kl 00:45.

Ég skellti mér fram og kíkti í bókahilluna. Ég hef ekki lesið bók í tvö ár, er ekki að grínast.
Fann Draumalandið hans Andra Snæ Magnasonar. Ég gat ekki hætt að lesa hana. Er búin með rúmlega helminginn og hlakka til að glugga í hana í dag.

Ein ógeðslega sein.. Fyrir fjórum árum voru allir að dásama drenginn og þessa bók en ég var ekkert á því að lesa hana þá. Þarf að bíta í það súra en hey er heppin að eiga allavega helminginn eftir.

Hvaða bók mælið þið með að ég lesi næst..?

Office - uppáhalds skóbúðin mín

2010-11-08T13:51:00.000Z

Office Shoes - Ankle Boots for her - Office - KORR LACE UP BROWN LEATHER

Langar í þessa hérna að ofan.. Ohh mega kósí og þæginlegir

Er ég rugluð að vilja splæsa í svona stígvél.. ?

Office Shoes - Knee Boots for her - Hunter - HUNTER ORIG ADJUSTABLE GREEN

Varúð varúð jólastöff framundan..

2010-11-04T15:37:00.000Z

Við Krissi vorum um daginn eitthvað að krúttast með strákana í höfuðborginni um daginn og hlustuðum á kór róna (corona) syngja jólalög á Austurvelli.

Þegar ég segi um daginn þá var það í byrjun september.

Ég er búin að kaupa fimm jólagjafir og ég held að ég hafi aldrei á ævi minni byrjað að kaupa jólagjafir í október.

...

Annars er ótrúlegt hvað naglalakk getur gert mikið fyrir litla sál eins og mig.

Ég hef oft ekki tíma til þess að greiða mér á daginn né að gera eitthvað krúttlegt handa sjálfri mér. Setti naglalakk á táslur og fingur (á neglurnar að sjálfsögðu)
- Voila og maður er búinn að bjarga kúlinu.

...

Tók til inni í bílskúr hjá mömmu og pabba um daginn og fann fullt af fáránlegu stöffi. Ég var alein skellihlægjandi með föt og skó sem að systur mínar klæddu sig í án þess að fá borgað fyrir það. Ég ætti bara að taka mig til og taka myndir af þessu og pósta því á alnetið.

Er núna að bíða eftir boði í mega 90's partý..

...

21.10.10

2010-10-21T17:23:00.000+01:00

Greyið Krissi .. víst að það er enginn tilbúinn að vera með mér í fjallgönguklúbbi þá ætla ég að troða honum í klúbbinn minn hvort sem honum líkar það eða ekki.

Ég hef ákveðið að skíra klúbbinn Þrusu Klifurgarpar.

Ok eða ekki. Ætti kannski að hætta að stofna endalausa klúbba.

Allavega er fólki guðvelkomið að koma með mér í fjallgöngu, ég stefni á Helgafellið fljótlega.

. . .

Núna er Úlfar byrjaður á fullu í leikskólanum og það er alveg dásamlegt að geta fylgst með snúllanum í gegnum myndavefinn þeirra á foreldrasíðunni. - Vera lítil fluga á vegg.

Haha hann er svo fyndinn.. hann elskar rigningu og ég geri ráð fyrir því að hann sé þarna að fíla rigninguna í klessu.

. . .Orri er orðinn 4.mánaða og er doldið hávær..

.. er farin að sjá fyrir mér hvernig unglingsárin verða.

Fjalla-Þórunn

2010-10-20T00:20:00.000+01:00

Ætla að stofna fjallgönguklúbb í vetur ..

Hver vill vera með mér að klífa fjöllin blá og er í leiðinni með hugmynd að nafni á klúbbinn...?

Ohh ég finn alveg fílinginn að ganga upp fjöll með yndislegu fólki í smá frosti
og fá sér svo heitt kakó eftir á.

Mmmm.

La, lalalaala laaaa..

2010-10-18T12:01:00.000+01:00

Ég hlustaði mikið á tónlist þegar ég var yngri. Trítlaði oft inn í herbergið hjá bróður mínum og fann þar ýmsa diska. U2, Flaming lips, Verve og fleiri hljómsveitir voru uppgötvaðar inní herbergi hjá bróður mínum.

Gramsaði einnig oft í diskunum hjá mömmu og pabba og þar voru oft diskar, reyndar ekki margir, sem þau keyptu erlendis. Best of the 60's - 70's voru í uppáhaldi hjá mér.

Man reyndar eftir því þegar þau komu heim eitt með tvöfaldan geisladisk með Elton John sem var spilaður fram og tilbaka.

Ég verð að viðurkenna að ég kemst alltaf í mikið stuð þegar ég spila Krókódílarokkið hans. Það er einmitt eitt af lögunum sem er á "takatil" - lagalistanum mínum.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Sem minnir mig á það - mánudagsþrif - hér kem ég.

Að vera lúði er góð skemmtun

2010-10-15T23:18:00.002+01:00

Skrifaði færslu í gær um hárið á mér.. Hún hvarf af yfirborði jarðar sem er kannski bara fínt.

Ég var sem sagt að kvarta sem er ekki kúl hérna á þessari bleiku fréttasíðu.

Sit alein inni í stofu, drengirnir sofnaðir fyrir löngu og ég veit eiginlega ekki á hverju á eigi að byrja.

Á ég að vaska upp, taka til, þvo þvott. Nei vitiði það er föstudagskvöld og maður á að slaaaaka.

Anda inn, anda út.

Var einmitt að velta því fyrir mér áðan að ég hef varla lesið heila bók í næstum því tvö ár. Er það ekki ólöglegt..?

Ok þá er ég að meina bók sem er a.m.k. 200 bls ekki barnabækur með endlausum myndum.

.
.

Ég hef alltaf verið fáránlega mikill sökker fyrir ævintýrabókum og myndum, á t.d. eftir að sjá uppáhaldið mitt - Alice in Wonderland kvikmyndina - og ég á eftir að sjá þrjár síðustu Harry Potter myndirnar.

Ætla að reyna að troða í höfuðið á Krissa að það sé allt í lagi að horfa á svona krúttlegar myndir með mér.. Næsta mál að dagskrá - leigja Alice in Wonderland.

Hvað haldiði, Þórunn litla Þórarins ætlar að taka þátt í lottóinu á morgun. (setti þetta bara inn til að minna mig á að lotta á morgun.)

Góða helgi gott fólk.

Landafræðikrútt

2010-10-10T12:04:00.000+01:00

Það er ekkert svaðalega langt síðan ég setti inn vídjó af Úlfari litla landafræðisnilla.. Hann var svona rúmlega eins árs þegar hann gat sýnt foreldrum sínum hvar Kína, Bólivía, og Ástralía væri.

Hildur systir sýndi mér svo vídjó af 2 ára snillingi sem vissi hvar lönd væru sem ég (#hóst#- er ömurleg í landafræði) hafði ekki hugmynd um hvar eru.

Má ég kynna Lily :

Fyndið og fallegt

2010-10-09T01:25:00.000+01:00

Iron & Wine - Carousel - fallegt og hugljúft lag.

Mér finnst ég vera alveg fáránlega "wild" að vera vakandi kl 00:00 - fyndið.

Gróf upp hlaupagallann og fór á hlaupaæfingu hjá FH - niðurstaða: HARÐSPERRUR. - fyndið (afhverju fyndið, því það er fáránlega fyndið að fylgjast með mér, allt orðið fáránlega erfitt, erfitt að standa upp úr sófanum, erfitt að ganga niður stigann o.s.frv.)

Hjálpaði nágrannakettlingi frá ógeðis feitabollukisu sem var að ráðast á minni máttar. Fallegt af mér að hjálpa kisu í neyð. (úbbs, dagur 2 og ég ætlaði mér ekki að blogga um kisur, æji þær eru bara svo dásamlegar þær verða að fá að glugga af og til í bloggunum mínum.)

Bloggið er lifnað við aftur.

2010-10-05T20:42:00.000+01:00

Það er svo mikið að gerast í höfðinu á mér að ég verð að koma því niður á blað.

Er t.d. eitthvað að hlunkast við að grenna mig þessa daganna. Gengur ekki vel.

Fer út að hlaupa og finnst eins og að ég sé ein risastór kjötbolla.

Burt með kjötbolluna og inn með sushi..

Það er eitthvað svo hreint og fallegt við að vera Sushi.

.
.
.

Ok þegar ég sagði áðan "fer út að hlaupa" þá er ég eiginlega ekki búin að hlaupa neitt að ráði.

Hljóp upp á leikskóla á fund á spariskónum í síðustu viku það var í svona 3 mínútur. (hugsaði samt allan tímann... kjötbolla, kjötbolla.)

Er farin að grafa upp hlaupagallann.

Vika 38

2010-05-29T11:29:00.000+01:00

Já komið þið sæl og blessuð ..

Við erum sem sagt búin að flytja á Hjallabrautina góðu og erum virkilega ánægð í kjallaranum hjá Mömmu og Pabba. Erum reyndar ennþá að koma okkur fyrir .. en íbúðin á eftir að verða mega huggó.

Margir eru búnir að spyrja mig hvernig það sé eiginlega að flytja aftur "heim til mömmu og pabba" .. mér finnst það æðislegt, enda er íbúðin alveg sér og ekki eins og við búum inni á þeim gömlu. Úlfar er alltaf í essinu sínu og dundar sér og leikur og er mjög ánægður með plássið og er kominn með sérkrók fyrir sjálfan sig.

...

38 vikur eru liðnar .. ó boy, og ó brother..

Þessi hreiðurgerð sem konur finna fyrir þegar þær eru óléttar hefur ekki komið í heimsókn til mín. Eigum eftir að gera ýmislegt og ég er orðin pínu stressuð að ná ekki að klára hitt og þetta fyrir stóra daginn.

...

Popppunktur að byrja aftur, styttist í HM, lítið kríli að fara að mæta á svæðið, brúðkaup hjá Kára og Ingu Huld í júlí .. ohh ég finn á mér að þetta sumar verði bara virkilega fínt.

Er samt mest spennt yfir popppunkti.

...

Langar að setja inn mynd af uppáhalds frænda mínum sem ég sakna svo mikið.

Borgarferð

2010-05-06T18:13:00.000+01:00

Ég og sonur minn dásamlegi fórum í æðislega borgarferð í dag.

Reykjavíkurborg varð fyrir valinu.

(Ég er búin að vera æst í að skoða utanlandsferðir undanfarið og er búin að skipuleggja nokkrar flottar borgarferðir næstu árin .. tek allavega minn heittelskaða með mér og einhverja vel valda vini.)

Allavega .. þá skemmti ég mér svo fáránlega vel í dag.

Fyrir nokkrum árum þá fór ég oftast alein á Laugarveginn og fannst það alltaf mega kósý en það er ennþá skemmtilegra að taka Úlfar með sér.

Fara á kaffihús, kíkja í búðir, kíkja á endurnar og allt heila klabbið - Úlfar hefur greinilega fengið búðarápagenið frá mömmu sinni.
Uppáhalds búðin okkar beggja er án efa KISAN .. Var næstum því búin að kaupa gullfallegan gæsalampa en Krissi kom svo hitti okkur sagði við mig að hann myndi fyrst skila mér og svo skila lampanum þannig að ég keypti hann ekki.

Gæti vel verið að ég fjárfesti í svona kanínulampa eða bambalampa í staðinn fyrir krúttlegu gæsina.

Svo var alveg yndislegt veður og ég er ekki frá því að þrjár freknur hafi komið í hús í þokunni í Rvk.

En auðvitað er Hafnarfjörður langbesti bærinn .. þarf varla að koma því að framfæri .

"I've got sunshine on a cloudy day"

2010-04-25T10:41:00.000+01:00

Við Úlfar tókum smá photo booth session í gær .. reyndum svo að ná krúttlegri fjölskyldumynd en það gekk einhvern veginn voða illa svo við enduðum á að taka "kisuna" ..

...

Mig langar virkilega að hringja í dagskrágerðarmanninn á rúv og hrauna yfir hann.
(ok, ég fór á rúv.is og það eru svona skrilljón dagskrágerðarmenn.)
En allaveganna ... það er svo sorgleg dagskrá um helgar að ég fór næstum því að grenja í gráa sófanum inni í stofu í gær.

Ætti kannski bara að slaufa sjónvarpinu um helgar og byrja að föndra eða kannski lesa bækur.
Ég var nú einu sinni í bókaklúbbi held reyndar að ég hafi verið ein í honum ..
.. eins og svo mörgum klúbbum sem ég hef stofnað um ævina.

Útaf lélegri dagskrágerð á rúv þá hef ég mikið verið að "youtjúba" gömlum myndum sem voru í uppáhaldi á grunnskólaaldri.

Ætla að reyna að redda þessari mynd á næstu dögum .. einhvern veginn.

Úlfar landafræðinörd..

2010-04-20T21:50:00.000+01:00

Jæja taka 2 ..

Sendi hér inn hið alfræga vídjó af Úlfari fyrir Mömmu mína og þau ykkar sem eru ekki með facebook síðu.

Litli snillingurinn.. :)

Spurning dagsins

2010-04-15T15:42:00.000+01:00

Við Krissi erum mikið búin að rökræða undanfarna 2 daga um hvernig sófinn okkar sé á litinn..

.. erum sem sagt alls ekki sammála um litinn.

Að sjálfsögðu hef ég rétt fyrir mér .. en vil samt helst fá þetta á hreint og fá niðurstöður.
Hér að ofan sjáið þið Úlfar krúttsprengju sita í þæginlega sófanum okkar.

Spurning dagsins er sú kæru vinir :

Hvernig er sófinn á litinn..?

Vinsamlegst svarið í kommentakerfið hérna á síðunni.

Kærar þakkir til ykkar sem svarið spurningunni.

kv. Þórmundur

Góðan daginn sólskin..

2010-04-13T11:03:00.000+01:00

Næstu vikur verða ansi viðburðaríkar.

Úlfar er að verða 17 mánaða og styttist í að hann verði stóri bróðir.

Þriggja manna fjölskyldan er að fara að flytja í kjallarann á Hjallabrautinni í svona rúmlega ár .. og erum við bara ansi spennt yfir því.

Krúttið sem er vaxa og dafna inni í "boltanum" eins og Úlfar kallar kúluna mína er væntanlegt í heiminn þann 12. júní.

Er að pæla í að virkja aftur fréttasíðuna thorunnthorarins.blogspot.com .. sem verður að sjálfsögðu frábær fréttasíða með öllu þessu helsta.

- "Í næsta tölublaði" verður fjallað um hver eigi krúttlegastu tærnar, hver beri eiginlega ábyrgð á hruninu, hvar plástrar séu ódýrastir og sitthvað fleira.

Ætla að enda fyrstu færslu ársins 2010 með lagi frá flaming lips ..

2009-08-18T14:59:00.000+01:00

"Sumarið er tíminn" sagði einhver sköllóttur maður.
En sumarið er búið að vera undarlegt og erfitt.

Ég á yndislegan kærasta, son, fjölskyldu, tengdafjölskyldu og vini sem hafa hjálpað mér í gegnum sumarið.

...

Við Úlfar ætlum að skella okkur út til Marmaris núna á föstudaginn með mömmu og hitta uppáhöldin okkar þau Hjördísi, Gússa, Silju Rut og Hildi og knúsast með þeim í eina viku.

...

2009-07-25T00:57:00.000+01:00

2009-07-20T01:21:00.000+01:00

"Ég sakna þín í birtingu að hafa þig ekki við hlið mér
og ég sakna þín á daginn þegar sólin brosir við mér.
Og ég sakna þín á kvöldin þegar dimman dettur á.
En ég sakna þín mest á nóttinni er svipirnir fara á stjá.

Svo lít ég upp og sé við erum saman þarna tvær
stjörnur á blárri festinguni sem færast nær og nær.
Ég man þig þegar augu mín eru opin, hverja stund.
En þegar ég nú legg þau aftur, fer ég á þinn fund."

(brot úr laginu Tvær Stjörnur e. Megas)

elsku litla krúttið hennar mömmu sinnar.

2009-05-09T00:18:00.000+01:00

...

14. mars 2009

2009-03-14T13:48:00.000Z

Óheppnisþórunn hefur vaknað aftur til lífsins. Er farin að segja á-i svona án gríns 15 x á dag.

T.d. í dag þá hef ég rekið tánna utan í vegg, í stól (3 x reyndar) og í hurðarkarminn. Alveg hreint viðbjóðslega pirrandi.

...

Við Krissi erum að pæla í að opna lítinn skemmtigarð ..

þvottaland.

Æsispennandi staður fyrir krakka frá 1-5 ára. Þeir geta t.d. búið til fjall af hreinum þvotti og klifrað upp á það .. eða dreift þvottinum út um allt og hoppað í hann. Mega fjör.

Almáttugur hjálpi mér .. finnst eins og ég sé annað hvort alltaf að þvo þvott eða að ég þurfi að brjóta saman þvott.

...

Wolfmother

2009-02-15T20:02:00.000Z

Þá er drengurinn okkar kominn með nafn. Hann var skírður Úlfar Kristmundsson og fer það honum svona líka vel.

Ég var að pæla í því á föstudaginn að vera með beina lýsingu frá Opnun Krónunnar. Ég fylgdist með fólki hlaupandi að búðinni í mikilli geðshræringu og það kom síðan út með nokkra poka og klósettpappír. Sá fullt af frægu fólki og meira að segja kennara sem kenndi mér í Víðistaðaskóla. Svona er nú gaman að eiga heima á móti aðal búðinni bænum.

...

Ég hef aldrei á ævi minni verið jafn hvít og fór að ráðum Thelmu vinkonu minnar að skella smá brúnkukremi á andlitið. Fann brúnkukrem sem hjördís systir mín gaf mér í gjöf og makaði svona líka vel á mig á fimmtudagskvöldið. Vaknaði svo á föstudaginn tanaðari en allt. Gosh, ég held að ég þurfi bara að panta mér tíma í klippingu og aflita á mér hárið.

...

Vil óska Silju Rut frænku minni til hamingju með 13 ára afmælið í gær .. trúi því ekki að þetta barn sé að fara að fermast á næsta ári.

...

Mikið er ég ánægð með Einar Magnús vin minn .. ef þú ert ekki að kveikja þá er Einar Magnús uppáhalds veðurfréttagæjinn minn .. veðrið er svona líka fínt í dag og það á bara eftir verða ennþá betra núna í vikunni. Veii á það.

...

Talandi um veii, þá unnu FH stelpurnar KA/Þór og keppa í úrslitum á móti Stjörnunni. Ég er búin að fá pössun og mæti galvösk í höllina.

...

æji.. var að lesa yfir það sem ég var að skrifa.. kannski ég ætti bara að fara að byrja að blogga um kreppuna og davíð oddsson.

Gleðilegt nýtt ár kæru landsmenn.

2009-01-12T20:49:00.000Z

Ég er ekki frá því að ég hafi misst húmorinn um leið og Moli litli kom í heiminn .. ég er bara alls ekki fyndin lengur, sem er ansi leiðinlegt fyrir heimilsfólk mitt, fjölskyldu mína, vini og svo að sjálfsögðu þig kæri lesandi..

..

Núna á fimmtudaginn eru 7 vikur frá því sonur okkar kom í heiminn. Þessar vikur eru búnar að fljúga burt. Hann er farinn að segja brandara og borða pulsur með okkur Krissa. Nei ok kannski ekki alveg, en hann er farinn að hjala og brosa og er bara ofsalega gáfaður ungur drengur. :)

Hér eru nokkrar myndir af Mola:

finnst ofsalega notalegt að skella sér í bað

Moli að gera "svona stóóóóór"

nei okei hann er bara aðeins að teygja úr sér.

Var ekki sáttur akkúrat þarna á þessu augnabliki

Herra kjútí kjút

Rétt náði að smella mynd af feðgunum áður en þeir fóru út að hlaupa

"27, 28, 29, 30" Moli getur haldið bolta á lofti alveg eins og Mamma hans.

Ljúfa lífið ..

2008-12-19T17:46:00.000Z

Greyið Molmundur litli.. Mamma hans er alltaf að taka myndir af honum, annað hvort í photobooth eða á myndavélina sjálfa.

Erum komin í mega jólahjólaskap..

Vil benda ykkur á tvö falleg myndbönd á youtube, annað er hugljúft og fallegt og hitt er klassískt huggulegt jólalag :

Kristmundsson er mættur á svæðið ..

2008-12-02T11:49:00.000Z

Sonur okkar Krissa kom í heiminn 27. nóvember kl 21:27 eftir mikið puð.

En puðið gleymdist um leið og ég fékk hann í hendurnar.. :)

Hann er rúmar 15 merkur og 51.5 cm og náttúrlega algjör gullmoli.

setti inn nokkrar myndir af litla krúttinu

- hægt er að ýta hérna til að sjá litla molann okkar.

Okkur langar svo að þakka fyrir öll sms-in sem við fengum og öllum kveðjum sem við höfum fengið hér á alnetinu.

Lífið er svo sannarlega dásamlegt ..

Kúlan fer að hverfa ..

2008-11-26T04:02:00.000Z

Jæja.. á morgun eða annað kvöld verð ég sett á stað vonandi .. gæti verið að það frestist til fimmtudags .. erum orðin ofsalega spennt núna að hitta litla barnið okkar. :)

Ég á svo æðislegar vinkonur sem eru til taks alla daga .. tvær þeirra tóku sig til og tóku fallegar myndir af kúlunni.

Thelma tók þessa :og Heiðdís tók þessa :

Bless bless fallega kúla ..

Ólík lög sem vekja lukku á laugardegi

2008-11-22T14:13:00.000Z

Stundum hugsa ég með mér .. "ohh afhverju hef ég ekki fundið upp á einhverjum ganglegum hlut eða t.d. samið fallegt rokklag."

Það hefði verið ógurlega töff ef ég hefði t.d samið þetta lag og verið ein af Veðurstelpunum :

ég er allavega jafn íturvaxin og þessar veðurstúlkur þessa daganna

...

Krissi er oft að grúska í undarlegum lögum og finnur einhver mega sega lög á youtube.
Ég er meira fyrir að rifja upp gamla tíma og finna lög sem ég tjúttaði við þegar ég var svona 11 ára.

"Boom boom boom, yeohooooooooo... "

Ógeðslega góður texti í þessu lagi.

Silja Rut 12 ára frænka mín er að læra freestyle og er farin að "youtjúba" ýmis lög.
Sendi mér um daginn t.d. þetta lag í gegnum msn..

silja rut :"Tjékkaðu á þessu lagi, það er gg. "
silja rut : "hlustaðu á það allt"

hahaha hún er of mikið krútt.
...

Systkini mín eiga nú einhvern hlut í tónlistarkunnáttu minni.
Hildur systir kenndi mér t.d að hlusta á tónlist þegar við vorum ungar ..( reyndar var ég meira í því að grúska í geisladiskunum hans Tóta .. og varð svona líka að miklum u2 aðdáenda eins og alþjóð veit og Hjördís hlustaði bara á Duran Duran sem ég að vísu fílaði í tætlur sem ung lítil dama.)

Hildur var einlægur aðdáandi 2 unlimided og Dr. Albran var svalasti gaurinn norðan alpafjalla. (hef reyndar bloggað áður um hana Hillu sys og Dr. Albran .. en það er bara svo gaman að rifja það upp aftur, og aftur og aftur... )

"úúú held að ég finni 11 ára fílinginn "

"þetta myndband er einum of fyndið"
...

Foreldrar mínir hafa aldrei verið miklir tónlistarunnendur .. en keyptu oft plötur tengdar við áratug þegar þau fóru í utanlandsferðir .. Best of the ´60 s o.s.frv.

og hljómaðu nokkur lög með hljómsveitinni Hollies oft í eyrum mínum.

Þetta er uppáhalds lagið mitt með þeim og jafnframt síðasta lagið sem ég varpa hér fram á þessari síðu í dag.

"Bus stop, wet day, she's there I say
Please share my umbrella
Bus stop, bus go, she stays love grows
Under my umbrella
All that summer we enjoyed it
Wind and rain and shine
That umbrella we employed it
By August she was mine ... "

..

15 nóvember.

2008-11-15T07:32:00.000Z

í dag er 15.nóvember.

15. nóvember .. 15. nóvember. ég gæti endurtekið þessa dagsetningu nokkrum sinnum í viðbót því ég er ekki að kaupa það að það sé 15. nóvember.

Svo fólk haldi nú ekki að ég sé eitthvað rugluð .. þá var áætlað að barnið okkar Krissa myndi koma í heiminn í dag.

Krissi er löngu farinn á fætur og er í Keflavík þessa stundina að þjálfa drengina sína en er með símann sinn stilltan á hæsta ef að eitthvað kemur upp á .. sem ég efast reyndar um, barnið hefur það svo sannarlega kósý þarna inni.

...

Stjörnuspá - 15. nóvember 2008
fyrir 28. desember 1984

"Í dag er gott að leggja áherslu á vinnu, göngu eða aðra líkamlega hreyfingu. Þú ert kraftmikil og ákveðin, en einnig afslöppuð, og ytri aðstæður eru hagstæðar. Notaðu því tækifærið og vertu athafnasöm. Kýldu á mál sem þú vilt koma frá þér. (Tungl 120 gráður Mars)"
(fengið af stjornuspeki.is)

Ég er að pæla í að fara eftir þessari spá í dag. Ég er kraftmikil og ákveðin, en einnig ofsalega afslöppuð (kannski ekkert brjálæðislega kraftmikil en krafturinn er til staðar). Var að pæla í að fara í smá göngutúr í nágreninu og ganga svo upp og niður stigann í blokkinni minni. Málin sem ég ætla að kýla á er að kaupa jólapappír, jólakort og nokkrar gjafir.

...

Kannski veit barnið að það skuldar rúmlega 7,8 millur þegar það mætir i heiminn .. og það ætlar örugglega bara að hanga þarna inni þangað til skuldirnar verða afskrifaðar.

"Já vina mín / vinur minn þú fæddist í miðri kreppu árið 2008 .. kreppan kom bara svona bing bara búmm"

...

Ég ætla að spila nokkur lög i tilefni dagsins :

baby you´re rich man með bítlunum:

She´s having a baby með the knife

you´re just a baby með belle and sebastian

..

Move your boogie body

2008-11-10T18:35:00.000Z

Þetta verður mín líkamsrækt í janúar ..

"the bigger the circle the bigger the waist "

Vá ég hló svo mikið í dag, fékk þetta sent frá Klöru góðvinkonu minni.

Puhh á pilates, yoga, og á líkamsræktarstöðvar.

Boogie body er málið.. ;)

Ég hlakka svoooo til ársins

2008-11-07T13:23:00.000Z

*2010*

afhverju ..?

Af því að þá kemur Alice in Wonderland kvikmyndin í bíó ...

.. get ekki beðið, get ekki beðið.

bætt við:

var að fá nýtt sim kort í símann minn .. týndi hinu sim kortinu með öllum símanúmerunum.
Væri frábært ef þið mynduð senda mér annað hvort sms eða skilja eftir símanúmerin ykkar í kommentakerfinu.

Takk takk takk.

Ef að þér langar til þess að gleðja mig ..

2008-11-04T18:40:00.000Z

.. og fá plús í kladdann þá má sá hinn sami mæta með fullan poka af klökum á sléttahraunið.

mmmmmmmmmmmmmmmmmmmmm elska klaka og allt sem er kalt.

Borðaði nokkra snjóbolta um daginn þegar snjórinn var nýfallinn ..

...

Annars er ég ekki að kaupa það að það sé kominn nóvember ..

Tók þessa mynd alveg sjálf af mér í photo booth þegar ég var að baka á sunnudaginn og klukkan var 8:30.

Ég hélt dýrindis kökuboð síðasta sunnudag. Ég vissi ekki að ég gæti verið svona myndarleg.

...

Jæja, ég er farin að bulla ætlaði nú bara að setja inn frétt hérna inn á thorunnthorarins.is um að það gæti verið eitthvað erfitt að ná í mig ... var að færa mig yfir í TAL og er ekki búin að fá sent nýja sim kortið í pósti .. og þau eru búin að loka á hitt símakortið mitt.

Ef þið þurfið að ná í mig einn tveir og bingó.. þá getið þið hringt í heimasímann okkar

*445-1308 **

Mesta krútt í heimi er án efa og vafa :

2008-10-31T09:53:00.000Z

æjiii gat ekki valið á milli ET og Emilíönu Torrini .. þau eru bæði svo mikil krútt og deila því fyrsta sætinu .. hér fyrir neðan er lagið big jumps í flutningi ET ..... nei ég meina Emilíönu Torrini.

...

Ef þú ert súr, lítil/l í þér eða finnur að þú ert í pínu flippstuði þá mæli ég með því að þú stendur upp úr sófanum eða skrifborðsstólnum, setur uppáhalds músíkina þína í botn og byrjar að dilla þér pínulítið í takt við hana ...

... og ef þú ert komin í brjálaðan dillfíling þá getur þú jafnvel endað dillið á mega sega freestyle dansi.

Maður fær dásamlega útrás.

Mundu bara að draga fyrir gardínurnar ef þú vilt ekki að nágrannar þínir haldi að þú sért gúgú.

Svo ef að þú ert búin/n að vera mikið einn og langar að flippa aðeins meira þá er náttúrlega alltaf hægt að taka flugmyndir af sjálfum sér, málað á sig skegg eða búið til þína eigin músík.

Allar hugmyndirnar hérna að ofan eru ókeypis .. kosta ekki einu sinni túkall.

Það gleymdist nefnilega að hringja í mig og biðja mig að koma upp á skjá 1 til að taka upp mína ókeypis auglýsingu

.. vissi samt ekki tímalimitið, kannski væri mín auglýsing of löng.

p.s: er komin í frí.

19 dagar ..

2008-10-27T23:12:00.000Z

Þessar svartklæddu hér að ofan eru báðar orðnar dásamlegar mæður. :)

Thelma og Nonni eignuðust Loga litla 28. júlí þann magnaða dag .. og elsku Allý og Davíð til hamingju með molann ykkar sæta sem kom í heiminn á föstudaginn, hann er algjört krútt.

Þessi hvítklædda er hins vegar ennþá með sitt kríli inni í góðum fíling.. Ofninn þarf að vera stilltur á 220° en hann er núna í rúmum 200°.

...

Við Krissi hittum litla barnið okkar í rúmar 10 mín í dag .. fórum í vaxtarsónar og allt virðist vera í góðu lagi .. barnið er 12 merkur og er bara mega kjút með bollukinnar.

...

Ég er komin í jólafíling.. Keypti eina jólagjöf í viðbót í dag og sit núna fyrir framan sjónvarpið með Jólaöl við hönd .. mmmmmmm

sá sem fann upp jólaölið á skilið einhverja orðu eða jafnvel verðlaunapening.

"Maður er náttúrlega í íþróttum skohh, sleggjunni"

2008-10-20T11:49:00.000+01:00

"Gummi, þú átt nú einhvern þátt í þessu, helvíti litli kall"

Þórunn hjarta Jim.

2008-10-11T07:40:00.000+01:00

Ég trúi þessu ekki... Það er laugardagur og klukkan er tuttugu og fimm mínútur í sjö.

Og ég sem ætlaði að soooooofa út.

6:35 .. nei, nei, nei þetta er bara bannað, barnið er farið að vekja mig án þess að vera komið í heiminn..

Annars styttist í komu barnsins, verð að viðurkenna að ég er ansi spennt. + / - 35 dagar.

Við Krissi fórum upp á landspítala síðasta þriðjudag að kíkja á aðstæður, fengum að sjá svona það helsta, hvert við förum þegar við komum, fengum að sjá hvernig sogklukkur líta út og heyrðum fæðingarhljóð í dömu sem var að fæða barnið sitt.

..

Váá núna bjargar Youtube mér .. ég "jútjúbaði" Jim Carrey vin minn og er búin að grenja úr hlátri, sit alein inni í stofu að reyna að halda hlátrinum inni í mér svo að ég vekji ekki Krissa.

Hér eru tvö vídjó sem ættu að gleðja almúgann: Jim Carrey sem Jay Leno sem er kannski ekkert hillaríus en gaman að fylgjast með svona á laugardagsmorgni. Í seinna vídjóinu tekur kauði Conan O´Brian.

Hamingjusöm og hugljúf..

2008-09-28T22:48:00.000+01:00

Þessi sunnudagur er búinn að vera ofsalega skrítinn.. Svaf lítið sem ekkert síðustu nótt en náði þó að gera heilan helling af skemmtilegum hlutum í dag.

Er búin að vera að hlusta á hugguleg lög í tölvunni minni eftir sjónvarpsgláp á sjónvarpstöðinni rúv og kynnti kúlunni fyrir almennilegum tónlistarmönnum.

Kúlan fílar Bright eyes í tætlur og þá sérstaklega þetta lag.. :

Við Krissi erum að fara í foreldrafræðslu næsta þriðjudag og mér finnst ég vera eitthvað svo fullorðins .. en samt eitthvað svo lítil.

Svona lít ég víst út þessa daganna. Með risastóran hnött framan á mér, naflinn er orðinn flatur og fyndinn og ég er að fíla hnöttinn í tætlur. Þetta er svo yndislegt allt saman, að vísu get ég ekki sofið á maganum eða á bakinu og þegar ég næ að sofna þá sef ég bara í 2 tíma því hliðin sem ég svaf á verður svo skuggalega dofin og þá þarf ég velta mér yfir á hina hliðina. Svo eru sinadrættir ansi vinsælir þessa daganna en ég er alls ekki að kvarta, eftir nokkar vikur kemur litla barnið mitt í heiminn og ég mun án efa vera lukkuleg ung kona, með lítinn erfingja í höndum.

Miss Misery

2008-09-14T14:25:00.000+01:00

Ég er búin að vera að fresta uppvaski frá því í gærkvöldi.

" Æji ég ætla að horfa á þennan þátt og svo vaska ég upp. Hey ég vaska bara upp á morgun. - "

Svo í dag er ég búin að skoða síður á alnetinu, velja playlista sem heitir "vaska upp lög" , skokkaði í blómabúð og keypti afmælisgjöf, kom heim og ætlaði þá svo sannarlega að vaska upp.

Núna er ég að horfa á ógeðis þátt á skjá einum sem heitir High school reunion.

Bwahhh er hægt að vera meira latur..?

...

Annars langar mér í þessa skó :

Og svo langar mér í þessa kjóla :

Ég er rosalega slaufusjúk þessa daganna..

Hilla og Dísa .. ég er búin að búa til óskalista fyrir ykkur sem þið eigið að taka með ykkur til Flórída og New York.

Elliott Smith ætlar að ljúka þessari ágætu sunnudagsfærslu fyrir mig.

Ætli ég fari að vaska upp ..? stay tuned.

Næsta færsla fjallar síðan um þvott og þvottavélar.

...

2008-09-08T18:43:00.000+01:00

Draumur allra barna - er örugglega að fara í bangsaland eins og þessi litla skotta prófaði um daginn ... :)

..

Annars er ég orðin ofsalega spennt í að hitta litla barnið mitt. Rúmar 10 vikur þangað til það kemur í heiminn..

Vika 30

Brjóstin á þér eru enn að stækka. Þú gætir byrjað að finna fyrirvaraverki þó að flestar konur finni ekki fyrir þeim fyrr en á síðustu vikunum. Raunverulegir hríðverkir standa yfir í u.þ.b. eina mínútu og koma á fimm mínúntna fresti eða minna og standa yfir í a.m.k. klukkustund. Fyrirvaraverkir standa styttra yfir eru ekki eins sárir og koma óreglulega.

Á næstu vikum mun barnið bæta á sig fitu í meira mæli en áður. Húðin er ennþá svo krumpuð svo það er nóg pláss fyrir meiri fitu undir húðinni. Fósturhárin fara nú að minnka og augun hafa opnast alveg. Hiksti barnsins verður meira áberandi. Barnið vegur nú um 1,3 kíló og lengd frá höfði að rófubeini er um 27 sm.

Þessar upplýsingar hér að ofan voru fengnar af ljosmodir.is

Svo langar mig að biðja vini mína og vandamenn að afsaka hve gleymin ég er þessa daganna.
Gleymi öllu og öllum.

Mun bæta mig næstu daga .. ég lofa.. ;)

Endursýningar

2008-08-29T17:22:00.000+01:00

Mér finnst oft sniðugt hjá sjónvarpsstöðvum að endursýna þætti en það getur stundum verið ofsalega pirrandi að lenda í endursýningum á þáttum sem sýndir hafa verið nokkrum sinnum.

Við pabbi lentum einu sinni í allsvakalegri endursýningu. Við sátum heima í stofu og vorum að flakka á milli stöðva og enduðum á sjónvarpstöðinni Sýn. Þar sáum við að félagið okkar í enska boltanum, Liverpool, var að keppa við eitthvað erlent lið ..

Ég hjóp upp og poppaði og við settum okkur í stellingar.

Leikurinn var æsispennandi, mjög jafn og spennandi og náði Liverpool að tryggja sér sigur .. við pabbi hoppuðum úr sófanum og gáfum hvort öðru "hæ fæv" og hringdum svo í bróður minn sem þá bjó erlendis til að heyra í honum hljóðið, hvort hann hafi ekki örugglega séð leikinn.

Þórarinn eldri: "Sæll vertu vinur minn"
Þórarinn yngri: "Já sæll vertu faðir minn kær"
Þórarinn eldri: "Heyrðu sástu ekki leikinn áðan ..? Við Þórunn erum alveg himinlifandi yfir spilamennskunni."
Þórarinn yngri: "Ha, hvaða leik ..?"
Þórarinn eldri: "Hvaða leik .. sussum svei drengur - Liverpool - (man ekki hvað hitt liðið heitir)"
Þórarinn yngri: "Já, heyrðu þetta er eldgamall leikur, hann hefur örugglega bara verið endursýndur."
Þórarinn eldri: "Já okei .. djók."

Holiday ..

2008-08-19T14:44:00.000+01:00

Madonna er svo heppin að fá að hljóma í heila mínum þessa daganna.

Þetta lag sem hljómar hér að ofan er gjörsamlega fast í hausnum á mér örugglega út af því að ég er sjálf í fríi (holiday) þessa daganna.

Helgin mín fór í all svakalegt tjútt. Fór að sofa klukkan 2:30 aðfaranótt föstudags og rúmlega 04:00 aðfaranótt sunnudags. Skellti mér í djammgallan á laugardeginum og fór í allsvakalegt 80´innflutningsteiti hjá Hjördísi og Gvendi. Vaknaði á sunnudeginum og hélt án djóks að ég væri þunn. Fékk svakalega mikla löngun í kókópuffs, ég hljóp út í búð og splæsti í einn pakka og smá mjólkurdreitil til að mýkja kúlurnar.

Á Hjallabrautinni (í gamla daga) var kókó puffs aðeins keypt á jólunum eða þegar einhver fjölskyldumeðlimur átti afmæli.

Ef að maður svaf aðeins út þá var maður heppinn að ná svona rúmlega 18 kúlum í skálina sína..
.. sama var með homeblest kexið, ef móðir mín ákvað að splæsa í einn pakka til að hafa með kaffinu, þá þurfti hún að fela hann á mjög góðum stað. Maður gat alveg stútað heilum homeblest yfir barnatímanum.

Jæja ætla að nýta fríið mitt og gera eitthvað uppbyggilegt, eins og að útrétta eða fara í heimsóknir.

segi bara eins og Madonna :

" If we took a holiday
Took some time to celebrate
Just one day out of life
It would be, it would be so nice"

Já Madonna mín, það er næs að vera í fríi.

"E.T. phone home .. "

2008-08-09T12:15:00.000+01:00

Litli frændi minn kom í heimsókn til mín í gær og fékk að gista.

Ég stökk út í Nóatún og fyllti körfuna af alls kyns gotteríi með 5 ára dreng í huga.

Hann kom sjálfur færandi hendi með nokkra dvd diska og ákváðum við að horfa á stórmyndina E.T, afmælsisútgáfuna..

.. sem ég var ansi sátt með því það var mjöög langt síðan ég sá myndina síðast og mundi lítið sem ekkert af henni..

*Myndin byrjar*

Arnór Alex : "Krakkarnir eru ekki að reykja þetta er bara gufa þarna sem er inni í eldhúsinu"

Þórunn : "Já segjum bara að þetta sé gufa.."

Ég stekk inn í eldhús og næ í gúmmilaði

Arnór Alex: "Ekki fara, ætlaru að missa af myndinni .. það er ógillilega fyndið að fara að gerast núna"

Myndin gekk áfram og ég fékk að vita öll atriðin 5 mín áður en þau hófust.

setning eins og "Þetta er allt í lagi hann ET er ekki dáinn, hann lifnar við á eftir" fékk mig til að brosa út að eyrum og knúsa frænda minn í klessu.

...

Annars er ekkert í fréttum af mér, nema í dag er ég uppfull af kvefi og viðbjóði.

Bið bara að heilsa öllum.

Matargagnrýni Þórunnar

2008-07-22T18:01:00.000+01:00

Við skötuhjú fórum í dagsferð upp á Snæfellsnes og lékum okkur í náttúrunni.

Ok, lékum okkur kannski ekki mikið en við keyrðum hringinn í kringum nesið og tókum göngu á milli Hellnar og Arnarstapa í blíðskaparveðri.

Ákváðum að enda ljúfan dag í Borgarnesi og fá okkur mat í kroppinn.

Eitthvað heillaði Hyrnan okkur ekki og ákváðum að kíkja í miðbæinn og finna huggulegan veitingastað.

Reyndar keyrðum við um bæinn og reyndum að leita að einni af fallegstu götu landsins, Þórunnargötu, sem við höldum að við höfum fundið. Það vantaði nefnilega einn ljósastaur og við vorum alveg viss um að þar ætti að standa Þórunnargata.

Ég fann ekki mynd af Þórunnargötu en fann í staðinn tjaldstæðið við Þórunnarstræti sem er á Akureyri.

Hungrið var farið að segja til sín og sáum við glitta í spjald sem á stóð Filippiskur matur.

"Mmmm ég er alveg til í einn djúsí rétt" hugsaði ég með mér.

Lögðum bílnum og skottuðumst í átt að veitingastaðnum .. rétt áður en við stigum inn fæti sá ég standa á sama skilti DÚSSA Bar.

Við fengum matseðla um leið og við gengum inn og skrítin matarlykt og tónlist úr spilakössum tók á móti okkur.

Dússi sjálfur kom og tók niður pöntun frá okkur og ákváðum við að fá okkur Jolly borgara og gosglas.

Við vorum ekki einu viðskiptavinir staðarins, því annað par frá Vopnafirði sat fyrir aftan okkur og pöntuðu þau sér plokkfisk og pítsu.

Freshetta pítsan fór eitthvað illa í ofninum svo huggulega daman frá Vopnafirði fékk sér einnig plokkfisk, en greyin biðu í rúman klukkutíma eftir plokkfiskinum, starfsmaðurinn hefur örugglega stokkið út á höfn til þess að dorga í matinn.

Við fengum án efa verstu hamborgaramáltíð sem hefur komið inn fyrir mínar varir, borgarinn hefði alveg eins getað verið mjög vel kryddaður skósóli.

Dússi fær samt hálfa stjörnu fyrir að vera með sjónvarp í boði og fengum við að horfa á stórskemmtilega þáttinn Klovn en það hefði samt verið meira við hæfi við staðinn ef að hann hefði boðið upp á klám.

"Hello, goodbye .. "

2008-07-03T22:40:00.000+01:00

Ég gluggaði aðeins í fréttablaðið í morgun .. fletti því hægt og rólega og las fréttir og sitthvað fleira.

Las t.d. smáauglýsingarnar, annað hvort var einhver að gefa frá sér kettling eða fólk að henda inn atvinnuauglýsingum.

Ég flissaði ansi mikið þegar byggingafélagið Timburmenn auglýstu eftir verkefnum.

Það þarf ansi lítið til að gleðja litla sál eins og mig.

..

Fór í pínulitla strætóferð í dag .. í bílnum voru krakkar, gamalmenni, nordjobbarar og svo ég.

Þegar ég ýtti á stansrofann sá ég glitta fyrir ofan strætóbílstjórann orðið STANNAR.

Eitthvað minnti það orð mig á kompás þátt sem ég horfði á Stöð 2 síðasta haust.

..

Heyrðu mikið líður tíminn hratt .. Það eru komnar akkúrat 20 vikur og 5 dagar og barnið er í gríðarmiklu stuði í maganum sem stækkar með degi hverjum.

Það voru einhverjir ljúflingar að biðja um mynd af mér og kúlunni, ég smellti inn einni sem er að vísu ekkert svakalega kúl .. en mynd engu að síður..

Ætla að enda þennan furðulega pistil á laginu "halló og bless"

(pant eignast svona galla í nánustu framtíð)

Viltu tyggjó væna..?

2008-06-24T20:27:00.000+01:00

Mér finnst ofsalega gott að troða upp í mig tyggjói, sérstaklega þegar ég er með óbragð í munni og tannburstinn fjarri góðu gamni.

Svakalega finnst mér samt gaman að fygljast með karlkyninu tyggja tyggjó .. ég þekki nokkra karlmenn sem eiga helst ekki að troða tyggjói upp í sig.

Það eru t.d. tveir í minni famelíu sem eru eins og versta gerð af gúmmítöffurum þegar þeir japla á extra tyggjóinu sínu, það vantar bara gel í hárið á þeim og demants eyrnalokkinn í annað eyrað.

...

Svo eru sumir sem tyggja sitt tyggjó svona :

...

Ég var búin að gleyma því að thorunnthorarins.is væri afmælisdaga síða..

Í dag á engin önnur eeeeeeeeen Eva Dís Þórðardóttir 24 ára afmæli ..

Hipp hip húreeiii..

Elsku Arnold minn hafðu það ljúft og gott í dag ..

knús og kelerí

þinn bróðir Danny

Hér er ekkert reif í boði...

2008-06-15T13:24:00.000+01:00

Bara - dans, dans, dans, dans, daaaaaans.

Þessi pía er ansi krúttaraleg :

Þetta lag hér fyrir neðan er eitt af mínum uppáhalds lögum:

...

Ef að þið eruð ekki að fíla huggulegu lögin mín sem hljóma hér að ofan þá er bara um að gera að reima á sig íþróttaskóna, fara í spandex gallann og hitta Paul Eugene sem er að tröllríða heiminum þessa daganna með dans dans dans þolfimitímum sínum .. ´

ýtið hér til að komast í þolfimitímann

Ef ég á að vera hreinskilin ..

2008-06-04T01:42:00.000+01:00

.. þá er ég óeðlilega ástfangin.

Ástfangin af rauðri handsápu sem heitir red cherry.

Ég þvæ mér um hendurnar óeðlilega oft þegar ég er á Hjallabrautinni því það er guðdómlega góð lykt af henni. Aaaaaaaa.

Kynntist sápunni reyndar fyrst hjá frænda íþróttaálfsins og ég gaf honum + í kladdann fyrir að eiga svona huggulega sápu.

Hún er meira að segja mjög ódýr .. mæli með að þú komir við á brautinni, hjá frænda íþróttaálfsins eða bara að þú verslir þér eitt stykki sjálf/ur.

Þetta er sápa en ekki handsápan góða sem ég var að hæla hér að ofan.
...

Eins og alþjóð veit þá er ég ofsalega hrifin af Fóstbræðrum, sérstaklega fyrstu seríurnar þegar Hilmir Snær og Benedikt voru á meðal leikenda.

Þessi skets er í uppáhaldi hjá okkur systkinunum .. ógeðslega fyndinn og svona æjii neiii greyið.

"Nú gekk ég of langt .. djöfull er ég óöruggur maður."

"Ég má ekki fara að grenja, má ekki fara að grenja, stattu þig Mummi litli "

"I'm like wow, He's the greatest dancer! "

2008-05-21T18:21:00.000+01:00

Mikið elska ég lyktina af sumrinu.

Það var einstaklega góð lykt úti í morgun þegar ég skokkaði út í Nóatún og keypti rúnstykki og með því .. ég byrjaði að ganga af stað en stoppaði síðan og andaði að mér sumarlyktinni og tók smá öndunaræfingar á miðri götunni.

...

Ég veit að það er ógeðslega ljótt að öfunda en ég er ofsalega öfundsjúk út í systur mína og hennar spúsa .. akkúrat núna í þessum skrifuðu orðum eru þau í flugvél á leið til Nýju Jórvíkur.

Öfund.

...

Sister sledge er hljómsveit dagsins á thorunnthorarins.is og ætla þau að slútta þessari stuttu öfundarfærslu fyrir mig :

Gestablogg #2

2008-05-16T23:25:00.000+01:00

Ég auglýsti á sínum tíma eftir fólki sem vildi vera gestabloggari hér á þessari huggulegu síðu og fékk ég þá einungis rafpóst frá einum ungum manni sem ég kalla HH. Hann er mikill hugsuður sá maður og hefur ákveðið að ausa yfir okkur hugsunum sínum.

Hann Hreggviður er skemmtilegur..

"Hreggviður Hólmar kveður sér nú til hljóðs í annað skipti. Í síðasta pistli mínum fjallaði ég um stefnumótasíðuna einkamál.is. Enginn fann þeim skrifum nokkuð til foráttu og tek ég því þannig að vinir Þórunnar séu upp til hópa skráðir meðlimir eða fyrrum meðlimir síðunnar og engin skömm af því.

Huga mínum eru fá takmörk sett. Þannig á hugur minn til að reika allt frá kjarna jarðar til ystu marka alheimsins. Það er einmitt þessi seinni partur sem vekur sérstakan áhuga minn, en líka ótta. Eðli manna er að óttast það sem þeir ekki þekkja og til að eyða óttanum er aðeins ein leið, kynna sér hlutina. Í langan tíma glímdi ég við þá spurningu hvort geimverur væru til. Í fyrstu var ég sannfærður að svo væri ekki. Ástæða þeirrar ályktunar má eflaust rekja til þess að allar ljós- og upptökumyndir sem náðst hafa af UFO-s, hafa reynst falsaðar, bara plastpokar eða freesbe-diskar á fleygiferð o.þ.h. Þar sem ég er mikill efasemdamaður krefst ég ávallt óhrekjanlegra sannana og leyfi sjálfum mér ekki að trúa hverju sem er á þeim grundvelli einum að hið gagnstæða sé ekki sannað. Síðan fór ég að skoða þetta geimveru-mál frá öðru sjónarhorni enda heilastarfsemin og rökhugsunin nokkuð betur í stakk búin að eiga við svona pælingar þegar aldurinn færist yfir. Framangreint sjónarhorn felur í sér að reyna að átta sig á stærð alheimsins, en það er ómögulegt, sannast sagna. Hins vegar getur maður fallist á að alheimurinn sé það gríðarlega stór og gamall að engar líkur séu á að sú atburðarrás sem leiddi til myndunar jarðarinnar hafi ekki átt sér stað á öðrum stað í alheiminum, þ.e. engar líkur eru á að þau lífrænu skilyrði sem eru grundvöllur fyrir tilveru lífs á jörðinni hafi ekki myndast á öðrum stað í alheiminum. Einnig má líta svo á að hin jarðlegu lífrænu skilyrði séu ekki nauðsyn þess að líf geti þrifist. Af þessu dreg ég ekki ályktun um tilvist geimvera, heldur lít á þetta sem sönnun, tölfræðilega sönnun, fyrir því að geimverur séu til. Allt annað er ómögulegt. Þannig að niðurstaðan er sú að við erum ekki einu geimverurnar.

Þegar maður hugsar um jörðina í alheimssamræmi, sögu hennar, sögu lífs á henni allt frá örverum til manna, forfeðra okkar og forfeðra þeirra, þá sér maður hvað við „homo sapien“ erum lítið fyrirbæri. Eingöngu smá partur af sögu einnar lítillar plánetu í einni vetrarbraut í einni stjörnuþoku. Ef mannkynið yrði fjarlægt úr alheiminum, yrðu áhrifin svipuð og ef fjarlægður yrði einn líter úr sjónum. En hver er framtíð mannkynsins, erum við komin á lokastig þróunar á jörðinni, erum við endinn á keðjunni sem lokar hringnum, hvað ef eitthvað, tekur við af „homo sapien“? Það er engin ástæða að telja mannkynið, einsog við þekkjum það, vera lokapunktinn, besta galdur guðs. Við munum eflaust líða undir lok með einum eða öðrum hætti einsog annað líf hér á jörðinni, hvort sem það verður á grundvelli þróunar eða dómsdagsatviks. Aðlögunarhæfni er okkar helsta vopn og enn hafa hvorki sjúkdómar né hörmungar náð að binda enda á tilvist okkar. Aðlögunarhæfni í hönd við þá samkennd sem einkennir menn, hefur öðru fremur haldið okkur á lífi. Samkenndin birtist með þeim hætti að þegar einstaklingar byrja að hrynja niður vegna sjúkdóma hlaupum við upp til handa og fóta við að finna lækningar gegn kvillanum og linnum ekki látum fyrr en það tekst. Þegar fullkomin lækning á krabbameini lítur dagsins ljós mun líða skammur tíma þar til nýr sjúkdómur mun herja á okkur, sama sjónarmið á við um alnæmi og aðra banvæna sjúkdóma. Endurnýjun á banvænum sjúkdómum, eins sorglegir og hörmulegir þeir eru, halda stofnstærð tegundarinnar í þokkalegu jafnvægi. Komi sú ólíklega staða upp að allt mannkynið yrði ónæmt fyrir öllum sjúkdómum, þyrftum við að grípa til þess ráðs að grisja niður fjöldann með eigin ráðum. Ég persónulega yrði hrifnastur af hugmyndinni að enginn yrði eldri en 75 ára, eða nota einhvers konar meðaltals-aldursviðmið, einföld lausn, á X ára afmælisdeginum þá ferðu bara í sprautu, þetta er auðvitað ógeðsleg tilhugsun. Önnur lausn er að setja kvóta á hvað fólk má eignast mörg börn. Þessi lausn er erfið í framkvæmd, t.d. ef barnafólk skilur og tekur saman við barnalausan maka, mega þau þá ekki eignast börn saman. Auk þess getur þessi lausn leitt til barnaútburðar sem er ámóta geðslegur og að horfa á kóp sem horfir á móður sína drepna með naglaspýtu af sauðdrukknum grænlenskum unglingi. Af þessu leiðir að sjúkdómar gegna nauðsynlegu hlutverki. Stærsta kost sjúkdóma verður þó að telja að þeir fara ekki í manngreiningarálit.

Svo ég snúi aftur að hugsunum mínum um alheiminn, stærð hans og eðli. Sú spurning sem ég pæli oft í er eftirfarandi; hvar endar geimfar sem skotið er upp frá jörðinni og látið halda þráðbeinni stefnu? Geimfarið í spurningunni er þannig hannað að það þolir allt þekkt og óþekkt veðurfar, það verður aldrei eldsneytislaust, og ekkert getur stöðvað það og auðvitað getur það flogið á margföldum ljóshraða. Einn möguleiki er að það komi aftur til jarðar, þetta þýðir væntanlega að alheimurinn sé einhvers konar kúla og hægt sé að fara út á einum stað og koma þá á sama tíma inn í öðrum stað, þ.a.l. myndi geimfarið enda aftur á jörðinni, svolítið einsog Snake án veggja. Annar möguleiki er sá að eiginlegur endi alheimsins sé til, þ.e. einhvers konar veggur þar sem alheimurinn endar bara og ekkert hægt að komast áfram. En sé þessi möguleiki skoðaður hlýtur maður að spyrja sig, hvað er hinu megin við vegginn, úr hverju er hin hliðin á veggnum. Ef það er bara svart fyrir aftan vegginn, engar stjörnur, bara svart tómarúm, þá er samt eitthvað þar, þ.e. svart tómarúm. Hvað gerist ef maður heldur áfram að fljúga endalaust í beinni stefnu í þessu svarta tómarúmi? Ég er ekkert hrifinn af Matrix-hugmyndum og held þeim algjörlega út fyrir pælingar mínar, en sumir bjóða þær velkomnar þegar hingað er komið.

Oft er sagt að alheimurinn sé stöðugt að þenjast út. Út í hvað er hann eiginlega að þenjast? Hverju er hann að ýta frá sér?, minnkar eitthvað annað þegar heimurinn þenst út?
Annars held ég að best sé að sætta sig við að, við erum bara af því að við erum og fáum að vera og því skulum við bara vera.

Við erum svo smá
svo ógurlega fá.
Milljarður glitrandi stjarna
og sumar með kjarna.
Hugsanlega leynist þar lýður
En meðan hann býður
þá óska ég þess
að hann sé örlítið hress."

Kv. Hreggviður Hólmar.

"Ég nota bara augnaráð"

2008-05-10T12:18:00.000+01:00

"„Ég hef rosaleg forréttindi á Íslandi. Get bara gert allt sem ég vil. Ég hringi í einhvern og fæ mínu framgengt, það er sama á hvaða sviði það er. Ég fæ VIP allsstaðar, afslætti, stjórna því sem ég þarf að stjórna,“ segir Ásdís Rán Gunnarsdóttir, fyrirsæta og athafnakona, í viðtali við Hauk S. Magnússon í nýjasta tölublaði Monitors sem kom út í dag.

Ásdís segist hafa verið fimmtán ára þegar hún hóf að sækja skemmtistaðinn Tunglið - og hún fór allt fram fyrir í röðinni. „Ég er búin að vera gera það í áratug,“ segir hún.
Ég nota bara augnaráð. Og að sjálfsögðu sjálfstraust. Það er alveg hard work að byggja upp vinsældir meðal dyravarða. Það fór mikið eftir því hvaða stelpuhópi maður var með og svo þurfti að tala þá til. En ég þarf enga taktík í dag, ég er orðin það þekkt að ég þarf þess ekki.“ " (fékk lánað frá monitor.is)

Er athafnakonan orðin gú gú .. fyrirgefðu Ásdís mín ef þú dettur inn á þessa síðu, ég fékk kjánahroll og gæsahúðsbólur aðeins við það að lesa nokkrar línur úr greininni og veit ekki hvort ég eigi að hlægja eða gráta. Get rétt ímyndað mér hvernig greinin sjálf er.

Ég horfði á viðtal við hana og móður hennar í kastljósinu um daginn og þar fékk maður krónískan kjánahroll sem blossaði upp á 30 sek fresti .. hélt að hún myndi kannski draga sig aðeins í hlé. En nei hún hatar ekki athyglina daman sú arna.

...

Sjónvarpsgúrúinn Þórunn Þórarinsdóttir á alltaf erfitt með að horfa á "intróin" þegar þættir byrja í imbanum, skiptir um stöð ef þau eru löng, fer á klósettið o.s.frv. .. ef Twin Peaks innslagið hér að ofan er ekki það lengsta í heiminum þá skal ég borða lifur og með því.

Muna: *grafa upp twin peaks seríuna sem fyrst*

...

Er að fara í Kópavoginn í dag .. að horfa á knattleik.
Vona að ég lendi ekki í svipuðum aðstæðum og í fyrra þegar ég var látin borga barnamiða og Krissi var spurður hvort að hann væri fullorðinn.

Læt alþjóð vita hvernig miðakaupin fara fram.

Sipp og hoj

2008-04-30T11:10:00.000+01:00

Sofnaði tiltölulega snemma í gærkvöldi. Vaknaði svo rétt um miðnætti aftur og gat ekki sofnað.

Fiktaði aðeins í tölvunni, setti rólega mjúsik á fóninn, hugsaði um blómin, sumarið og býflugurnar en ekkert gekk. Gat ekki sofnað aftur.

Tók því sængina mína og fór upp í sófa og kveikti á imbanum. Ég er ekki frá því að ég hafi horft á bjánalegustu mynd á öllum mínum kvikmyndaferli.

Trúi því ekki að ég hafi látið augu mín horfa á þennan viðbjóð.

Myndin hét Uppsprettan eða The Spring.

Ég sofnaði þó á endanum og dreymdi ansi mikið um vin minn Tryggva Rafnsson og leiksýninguna hans Barnið, sem hann leikur í þessa daganna.

Fyrst átti ég að borga tvo silunga til þess að komast inn í leikhúsið og þurfti svo að klæðast hvítum kufli til þess að komast inn í salinn. Sýningin var ansi góð, vona bara að ég verði ekki fyrir vonbrigðum næsta sunnudag þegar ég sé leikritið hans.

...

Ég hef aldrei prufað að taka eiturlyf en maðurinn sem leikstýrði þessu myndbandi hefur án vafa poppað einhverjar töflur eða fengið sér eitthvað vafasamt efni.

Lagið er samt alveg magnað, fíla það í ræmur.

Dagurinn og vegurinn

2008-04-27T21:14:00.000+01:00

Að bíða í röð er góð skemmtun ..

.. í alvöru.

Þoli ekki hvað fólk getur verið pirri pú á því að bíða í röð. Það er hægt að gera svo mikið.
T.d. Fylgjast með fólkinu fyrir framan mann, hlusta á aukahljóðin í kring, skipuleggja daginn eða vikuna og svo er hægt að taka einn góðan dagdraum á nokkrum mínútum.

...

Miðaldra fólk v.s Unglingar.

Ég tek upp hanskann fyrir unglingunum. Puuhh á miðaldra dónalegt fólk.

Talandi um miðaldra fólk .. er ekki frá því að ég hafi verið soldið miðaldra í mér í gærkvöldi.
Ætlaði að hafa mig til fyrir teiti hjá stórvini mínum honum Tryggva en ákvað að klára að horfa á mynd á stöð 2 áður en ég myndi henda mér í sturtu.

Haldið þið að ég hafi ekki tekið Þórarinn Böðvarsson á þetta, sofnaði fyrir framan imbakassann.

...

Mér fannst soldið fyndið að heyra ungling í félagsmiðstöðinni minni (ég segi minni, ég á hana ekki, en þið vitið hvað ég meina.) segja "svekkjó tyggjó" um daginn.

Ég var alveg " hvar lærðiru að segja þessa setningu ..?"

xxxx: "uuu ég bjó hana bara til sko."

...

Mér leiddist smávegis í dag og ákvað því að fara í smá göngutúr með ipodinn hennar Hillu sys.
Creedence clearwater varð fyrir valinu .. mikið var ég ánægð með lögin sem hljómuðu í eyrum mínum.

Ég sveimaði um norðubæinn í brjáluðum fíling, er ekki frá því að ég hafi tekið smá dansspor fyrir utan rauðu blokkina.

Mæli með að fólk taki sér Creedence clearwater dag.

Ást og friður..

Afmæli afmæli afmæli ... nei djók

2008-04-22T12:18:00.000+01:00

Þann 26. maí, sem er mánudagur, fæ ég að fara á tónleika.
Ég á svo huggulegan kærasta sem ákvað að splæsa í einn miða fyrir mig.

Enginn annar en Bob Dylan mun þenja raddböndin sín þetta fallega kvöld. Ég sé fyrir mér sól og blíðu þennan dag.

Ég er farin að hlakka soldið mikið til, svo er ég farin að halda Bob Dylan kvöld fyrir sjálfa mig til að hita mig upp fyrir tónleikana sjálfa, og hafa þau kvöld farið ansi vel fram.

Hér fyrir neðan er eitt af mínum uppáhalds lögum með kauða :

Hún átti afmæli í gær .. Hann á afmæli í dag.

2008-04-19T11:10:00.000+01:00

Hildur systir varð rúmlega þrítug í gær, 27 ára ung dama .. en er unglegri en lítill páskaungi.

Hún var ansi myndarleg og "bakaði" nokkar tertur frá Myllu, sem fóru vel ofan í maga.

Hildur hefur alltaf passað vel upp á litlu systur sína

En átti það oft til að stríða henni þegar þær voru litlar dömur (eins og fram hefur komið í bloggi mínu undanfarin ár.)

Hildur er þekkt fyrir að vera með gúmmíandlit, en heyrst hefur að Hildur sé launsystir leikarans Jim Carrey.

Elskulega Hildur, til hamingju með afmælið í gær.

Elsku Einar Karl, til hamingju með 28 ára afmælið í dag.

"Are you having a laugh "

Hér sjáið þið Einar þegar hann var 5 ára að máta sérsaumuðu jakkafötin sín.

Jiminn hvað þið eruð orðin gömul.

Knús og fullt af kossum til ykkar.

Afmæli, afmæli, afmæli.

2008-04-15T11:44:00.001+01:00

Ég vil óska góðvinkonu minni og frænku, Vigdísi Finnbogadóttir innilega til hamingju með afmælið í dag. Held að konan sé 78 ára í dag.

Það eiga einnig tvær Emmur afmæli í dag. Emma Watson sem er tíu ára í dag, nei ok hún er 18 ára. Svo á hún Emma Thomson líka afmæli, veit ekkert hvað hún er gömul en ég giska á 51 árs.

Það er alltaf gaman af afmælisveislum, sérstaklega þegar svona huggulegar konur eiga afmæli.

Talandi um huggulegheit.. þá á hann bróðir minn Þórarinn Bé einnig afmæli í dag.

Til hamingju með afmælið bróðir minn ljónshjarta.

Við fjölskyldan mín erum soldið lummó en við spilum alltaf afmælislagið með Bítlunum fyrir afmælisbarn dagsins og dönsum svo og klöppum saman höndunum í 2 mín og 52 sekúndur.

Hér er myndbrot frá afmælinu hennar mömmu síðustu helgi - shit hvað það var gaman :

"Ólafía er skotin í Ólíver .."

2008-04-09T17:08:00.000+01:00

Ég hef aldrei verið mikið fuglavinur, sem sagt ekki mikill aðdáandi. Er eiginlega bara frekar mikið hrædd við þá líkt og vinkona mín sem var einmitt gæs síðasta laugardag.

Hún var reyndar mjög hugguleg gæs, ekki bandbrjáluð og frek eins og þær sem halda sig niður við tjörnina.

Eitt sem fuglarnir mega þó vera ánægðir með, það er fögur söngrödd þeirra. Mér finnst dásamlegt að vakna á morgnanna og sjá sólina skína inn um gluggan og heyra Ólafíu og Óliver syngja fögur söng- og ástarlög í garðinum mínum.

Fólk sem kannast við mig vita að ég geng talsvert mikið, enda ekki svo sniðug að vera með bleikt kort í veskinu mínu sem flestir eiga á mínum aldri. En jæja nóg um það, á göngum mínum hitti ég alls kyns dýr .. flugur, kisur, pínulitla og einnig stóra hunda og svo fullt, fullt af fuglum.

Fannst t.d. ansi sérstakt að sjá 5 Hrafna (Krumma) á knattspyrnuvellinum hjá Víðstaðaskóla fyrir stuttu. Þeir voru ábyggilega að ræða saman um kreppuna og háa olíuverðið sem þeir finna svo sannarlega vel fyrir þessa daganna. Ég stoppaði og fylgdist með þessu Hrafnaþingi (var reyndar mjööög langt frá þeim út af fuglafóbíunni) og var ánægð með hve prúðir þeir voru, engin læti í þeim eins og alþingismönnum okkar en kannski voru þeir bara að halda lítið matarboð eða fara saman á fótboltaæfingu.

Læt hér fylgja brot úr fyrstu myndinni sem ég fór á í bíó þegar ég var ung lítil dama.

Þið getið meira segja sungið með titillaginu, því það fylgir texti með..

..

Aprílmánuðrinn er ansi erfiður hjá mér .. peningalega séð. Faðir minn átti afmæli 3. apríl

Afmælisbarnið, Hildur og sveitalúðinn

Móðir mín á afmæli á laugardaginn, bróðir minn á þriðjudaginn, Hildur systir á föstudaginn og spúsinn hennar á laugardaginn.

Ætla að finna einhverjar bílskúrsölur eða lagersölur og finna gjafir handa þeim.

Vélritunarkeppnin ógurlega

2008-03-30T13:57:00.000+01:00

Föstudaginn 27. mars var haldin sérkennileg keppni á Sléttahrauninu.

Tveir keppendur voru á staðnum. Þórmundur og Kristunn.

Kristunn var að fylgjst með Þórmundi sem var að rita eitthvað í tölvunni og gerði hún um leið grín að vélritunarhæfni hans, fingrasetningin hans var ekki til þess að hrópa húrra fyrir.

Um leið skoraði Þórmundur Kristunni á hólm, sem varð að massífri vélritunarkeppni.

Fingrasetning vs. Óeðlileg fingrasetning.

Mikil spenna var í loftinu.

Keppt var um að skrifa nokkrar línur sem voru aftan á bók um bítlana.

Þórmundur byrjaði keppnina og náði fínum tíma, 55 sekúndur.

Kristunn tók þá við og byrjaði ansi vel en gerði nokkrar villur og endaði því miður í 59 sekúndum og tapaði.

Þórmundur var ansi ánægður með útkomuna, hann vann keppnina og var um leið ánægður með
að hafa unnið með sinni óeðlilegri fingrasetningu.

...

Næst verður keppt í valhoppi niður stigarganginn á Sléttunni.

Fésbókin dregur mig niður og svo aftur upp

2008-03-27T21:48:00.000Z

Ég er ekki frá því að ég hafi orðið svolítið skelkuð þegar ég las nokkra rafpósta á gmailinu mínu sem sendur var í gegnum vefinn facebook.com.

"Þórunn - this is a courtesy alert by You are Beautiful! .
Someone bumped you down the ranking. They think you are 'sloppy'. (sorry, we don't share who - due to our privacy policy) "

Hversu fúlt er að vera sloppy. Mér finnst ég bara ansi hugguleg ung dama og mér finnst að sá sem hakaði við mig að ég sé sloppy má bara gjöra svo vel og hoppa ofan í hafið.

Ein ógeðslega bitur.

Veit reyndar ekkert hvað You are beutiful er og man svo sannarlega ekki eftir að hafa skráð mig í eitthvað svona bjánalegt stöff.

Fékk síðan social fréttir frá compare people. Nenni ekki að útskýra fyrir fólki sem er ekki með facebook hvað þessi liður fjallar um en fékk þetta sent :

"Here is what your friends think about

...... your strengths:
best singer
most loyal
best travel companion

... your weaknesses:
best friend
person with the best smile"

Ég hélt að ég væri með ágætis bros og ágætis vinkona en besti söngvarinn á meðal vina minna kom mér aldeilis á óvart, mikið er ég ánægð með lífið og tilveruna.

Má bjóða þér stærri maga..?

2008-03-26T14:27:00.001Z

Ég er ekki frá því að maginn minn hafi stækkað til mikils muna eftir þessa blessuðu páska.

Fór í dásamlegar matarveislur alla daganna og borðaði eins og ég ætti lífið að leysa.

...

Fór með ungum herramanni á cd og dvd markaðinn í Perlunni. Ég festi kaup á einum geisladisk og keypti einnig myndina Dumb and dumber. Ætlaði reyndar að gefa litlu frænku minni hann en því miður gat ég ekki hamið sjálfa mig og reif plastið af og tróð disknum inn í dvd spilara.

Þessi útgáfa sem ég keypti var rúmum 6 mínútum lengri en sú upphaflega því búið var að bæta við fleiri atriðum í myndina.
Ég var oft ekki viss um hvort að atriðin hefðu verið í myndinni eður ei.

Horfði svo á nokkur atriði sem höfðu verið klippt í burtu og jiimundur jónsson hvað þessi atriði hefðu eyðilagt myndina ef þau hefðu verið með í myndinni.

Skemmti mér konunglega yfir þessari klassík.

8 tær af 10 mögulegum.

..

Vil hér með óska Önnu Siggu frænku minni og hennar fjölskyldu til hamingju með litlu fallegu stelpuna þeirra sem kom í heiminn fyrir nokkrum dögum.

Vona að það sé voða kósý hjá ykkur svona fyrstu daganna .. er svo spennt að fá að koma að sjá ykkur.

Misskilngur á aldri

2008-03-19T16:03:00.000Z

Ung dama og gömul dama ..?

Ég er að bilast, ég næ ekki að sjá ungu dömuna á þessari mynd. Ég laug einu sinni að vinkonu minni að ég hefði séð þá yngri því hún reyndi að sýna mér hana nokkrum sinnum og svaraði ég henni á endanum að ég hefði séð hana. Ég var (og er) svo þrjósk að ég pakkaði myndinni niður og óskaði þess að ég myndi aldrei sjá þessa mynd aftur. En hér er hún og komin á síðuna mína og ég sé ekki $%&/(#" ungu dömuna.

...

Hef oft orðið ansi pirri pú þegar fólk spyr mig um aldur og ég svara því að ég sé 23 ára og svo svarar það mér í sjokkerandi tón að það hafi haldið að ég væri svona rétt rúmlega 18 ára alls ekki 23 ára.

"Já í alvörunni, ég er 23 ára.."

Var stödd með dásamlegri systur minni í apóteki á höfuðborgarsvæðinu um daginn. Á kassanum var kona að versla sér inn slatta af einhverju dóti og biðum við systurnar í röðinni á meðan.

Konan við kassann : "Ekki seljið þið rafhlöður hérna ..?"

Afgreiðsludaman: "Í heyrnatæki eða ..?"

Konan við kassann: "NEI"

Afgreiðsludaman bar upp verðið og konan borgaði og fékk síðan greiðslukvittunina til baka.

Konan við kassann : "Bíddu er einhver afsláttur á íbúfeninu ..?"

Afgreiðsludaman: "Já þú sérð hérna (bendir á kvittunina) að þú færð 5% afslátt af öllum vörunum sem þú keyptir hér."

Konan við kassann: "Bíddu nú við, eru einhverjir afsláttadagar í gangi ...
... ég er sko ekki eldri borgari."

Afgreiðsludaman : **roðn**

Við systurnar flissuðum lítillega en vorkenndum konunni ansi mikið á endanum, hún tók það nefnilega ansi mikið inn á sig að vera stimpluð sem eldri borgari.

Ég hef ákveðið að hætta að verða pirri pú ef fólk heldur að ég sé ung 17 ára pía .. finnst það bara hrós, það eru allavega engar hrukkur komnar í heimsókn til mín.

Big girls don´t cry

2008-03-16T21:53:00.000Z

Vaknaði í morgun með þetta lag í höfðinu á mér sem hljómar hérna að ofan.

Er undirmeðvitundin mín að segja mér eitthvað.

Indverskir dagar

2008-03-14T13:52:00.000Z

Ég veit ekki hve oft ég hef dásamað youtube.

Hildur systir mín sýndi mér hið fræga indverska vídjó "crazy indian video" en núna með enskum texta sem notandinn buffalx hefur dundað sér við að seta við fullt af myndböndum.

Óeðlilega fyndið.

Veit ekki hvort að ég sé með aulahúmor að verstu gerð en þetta myndband hérna (sem annar notandi er kallar sig Woodbulb bjó til) er svo fyndið að ég grenjaði úr hlátri.

"come see me eat nipples"

"do my hard, yes in the ear"

kv. aulahúmors pían

Sunnudagur til sælu

2008-03-09T22:02:00.000Z

Við Hildur systir kíktum í heimsókn til ömmu okkar í dag. Ræddum um daginn og veginn, fengum okkur ýmis góðgæti og lásum saman ljóð eftir Davíð Stefánsson frá Fagraskógi.

Amma mín, Sigurfljóð Jónsdóttir, sem verður níræð í sumar tók sig einnig til og flutti Gunnarshólma eftir Jónas Hallgrímsson fyrir okkur í einum rikk. Við systurnar urðum agndofa og klöppuðum fyrir henni líkt og við værum staddar á frumsýningu á leikriti aldarinnar.

Amma mín er dásamleg, mér þykir svo vænt um hana.

Gunnarshólmi

Skein yfir landi sól á sumarvegi,
og silfurbláan Eyjafjallatind
gullrauðum loga glæsti seint á degi.
Við austur gnæfir sú hin mikla mynd
hátt yfir sveit, og höfði björtu svalar
í himinblámans fagurtærri lind.
Beljandi foss við hamrabúann hjalar
á hengiflugi undir jökulrótum,
þar sem að gullið geyma Frosti og Fjalar.
En hinum megin föstum standa fótum,
blásvörtum feldi búin, Tindafjöll
og grænu belti gyrð á dalamótum.
Með hjálminn skyggnda, hvítri líkan mjöll,
horfa þau yfir heiðarvötnin bláu,
sem falla niður fagran Rangárvöll,
þar sem að una byggðarbýlin smáu,
dreifð yfir blómguð tún og grænar grundir.
Við norður rísa Heklu tindar háu.
Svell er á gnípu, eldur geisar undir.
Í ógna djúpi, hörðum vafin dróma,
skelfing og dauði dvelja langar stundir.
En spegilskyggnd í háu lofti ljóma
hrafntinnuþökin yfir svörtum sal.
Þaðan má líta sælan sveitablóma,
því Markarfljót í fögrum skógardal
dunar á eyrum. Breiða þekur bakka
fullgróinn akur, fagurst engjaval
þaðan af breiðir hátt í hlíðarslakka
glitaða blæju, gróna blómum smám.
Klógulir ernir yfir veiði hlakka,
því fiskar vaka þar í öllum ám.
Blikar í lofti birkiþrasta sveimur,
og skógar glymja, skreyttir reynitrjám.
Þá er til ferðar fákum snúið tveimur,
úr rausnargarði háum undir Hlíð,
þangað sem heyrist öldufalla eimur,
því atgang þann ei hefta veður blíð,
sem voldug reisir Rán á Eyjasandi,
þar sem hún heyir heimsins langa stríð.
Um trausta strengi liggur fyrir landi
borðfögur skeið, með bundin segl við rá,
skínandi trjóna gín mót sjávar grandi.
Þar eiga tignir tveir að flytjast á,
bræður, af fögrum fósturjarðar ströndum
og langa stund ei litið aftur fá,
fjarlægum ala aldur sinn í löndum,
útlagar verða, vinar augum fjær.
Svo hafa forlög fært þeim dóm að höndum.
Nú er á brautu borinn vigur skær
frá Hlíðarenda hám, því Gunnar ríður
atgeirnum beitta búinn. Honum nær
dreyrrauðum hesti hleypir gumi, fríður
og bláu saxi gyrður, yfir grund.
Þar mátti kenna Kolskegg allur lýður.
Svo fara báðir bræður enn um stund.
Skeiðfráir jóar hverfa fram að fljóti.
Kolskeggur starir út á Eyjasund,
en Gunnar horfir hlíðarbrekku móti.
Hræðist þá ekki frægðarhetjan góða
óvina fjöld, þó hörðum dauða hóti.
"Sá ég ei fyrr svo fagran jarðargróða,
fénaður dreifir sér um græna haga,
við bleikan akur rósin blikar rjóða.
Hér vil eg una ævi minnar daga
alla, sem guð mér sendir. Farðu vel,
bróðir og vinur!" - Svo er Gunnars saga.

- - -

Því Gunnar vildi heldur bíða hel
en horfinn vera fósturjarðar ströndum.
Grimmlegir fjendur, flárri studdir vél,
fjötruðu góðan dreng í heljar böndum.
Hugljúfa samt ég sögu Gunnar tel,
þar sem ég undrast enn á köldum söndum
lágan að sigra ógnabylgju ólma
algrænu skrauti prýddan Gunnarshólma.
Þar sem að áður akrar huldu völl,
ólgandi Þverá veltur yfir sanda.
Sólroðin líta enn hin öldnu fjöll
árstrauminn harða fögrum dali granda.
Flúinn er dvergur, dáin hamratröll,
dauft er í sveitum, hnípin þjóð í vanda.
En lágum hlífir hulinn verndarkraftur,
hólmanum, þar sem Gunnar sneri aftur.

Jónas Hallgrímsson

Pant verða eins og amma mín þegar ég verð stór.

a b c d e f g h i j k l m n ...

2008-03-04T15:53:00.000Z

Hildur systir mín lærði ansi snemma að lesa. Fyrsta daginn í 1.bekk tjáði kennarinn bekknum hennar að sérstakur leynigestur myndi mæta á svæðið daginn eftir.

Hildur varð ansi spennt og hugsaði með sér að kannski myndi Sigga Beinteins mæta á svæðið.

Daginn eftir mætti kennarinn að töflunni og sagði þeim að nú myndi leynigesturinn mæta í heimsókn:

... enginn annar en stafurinn A a.

Hildur varð ansi svekkt og súr yfir ömurlegum leynigesti.

...

Þessi drengur er óeðlilega fyndinn.. :

Brennt barn forðast ljósabekkina frh.

2008-03-01T11:53:00.001Z

Jiminn.

Þið hefðuð átt að sjá mig aðfaranótt föstudags.

Ég gat ekki sofið né verið í fötum og bjó til tóga og hélt smá þemapartý fyrir sjálfa mig.

Makaði á mig grænu aloe vera geli og var eins flubber í tógadressi.

Hafði það huggulegt í gærkvöldi og ætlaði að horfa á sjónvarpið, sem ég gerði.
Mikið rosalega var leiðinleg dagskrá í sjónvarpinu.

Stöð 2 sýndi myndina Hacker í svona skrilljónasta skipti,svo var póker á skjá einum og svo man ég ekki einu sinni hvað var á stöð 1.

Árshátíð í kvöld. Hlakka til að borða kræsingarnar og hafa það gaman með vinum mínum og vandamönnnum.

Brennt barn forðast ljósabekkina

2008-02-28T23:22:00.000Z

Ég ákvað í gærkvöldi að það yrði kannski sniðugt fyrir mig að skella mér einu sinni í ljós fyrir árshátíð bæjarstarfsmanna því það vantaði smá lit í andlitið á mér.

Þessi hugmynd var ekki sniðug...

...eiginlega bara hræðileg.

Hitti köllu og thelmu í dag og tjáði þeim að ég hefði farið í ljós í fyrsta skipti í rúmlega 4 ár.

Kalla segir: Ekki fórstu í stjörnusól ..?

Þórunn segir: Heyrðu jú, og framkallaði þessar líka fínu freknur..

Kalla segir: Já bíddu bara, þú átt ekki eftir að geta sofið í nótt, ég og Þór fórum um daginn og gátum ekki stundað "bííííííb" í þrjá daga út af því að þau eru nýbúin að skipta um perur og eitthvað dæmi..

Þórunn segir : uuu já vonandi er ég bara í fínu lagi.

Halli og lúja

Af hverju fór ég ekki bara á youtube í staðinn fyrir að fara í ljós.
Hún shez77, sem er frá Ástralíu, er svo yndisleg og kennir manni hvernig maður setur á sig brúnku án þess að skaða sjálfan sig. (andlega og líkamlega.)

Pant kaupa mér brúnkrem næst eða vera áfram hvít eins og sannur Íslendingur.

"Hlauptu eins og vindurinn"

2008-02-27T15:14:00.000Z

Haa..?

hvað segiru ..?

haa ..?

**roðn**

ha .?

Alveg finnst mér ofsalega erfitt og leiðinlegt að lenda í aðstæðum þegar maður skilur ekki setningu sem maður fær frá viðmælenda sínum.

Svo þarf maður að segja ha, eða hvað segiru nokkrum sinnum þar til maður segir bara "já einmitt", eða "í alvöru " svona til þess að forðast að segja aftur ha..? og viðmælandi manns verður ofsalega hissa í framan því kannski var hann að spyrja mig "hverja manna ert þú..? " eða "finnst þér tómatar góðir.?"

Var reyndar að uppgötva það fyrir stuttu að mér finnst tómatar hreinlega bara vondir .. og ég hef borðað þá í 23 ár.

...

23. ágúst 2008 - Af hverju er ég að skrifa þessa dagsetningu hér ..? :

Ta ta ta tammmm

.
.
.
.
.
.
.
.

því þá ætla ég að taka þátt í hálfmaraþoni.
Sagði einum fjölskyldumeðlimi frá því í gær, að litla barnið ætli að taka þátt í hálfmaraþoni og fékk þá þetta svar :

xxxx :"Já einmitt .. þú í hálfmaraþoni..?"
Þórunn ( verðandi hálfmaraþonhlaupari) : "Já ég ætla að hlaupa það, er byrjuð að æfa mig og allt, viltu veðja upp á að ég fari í það eður ei ..?"
xxxx: "Nú jæja og ég skal veðja, skal bjóða þér út að borða ef þú hleypur en þú verður samt að hlaupa það á skikkanlegum tíma."
Þórunn (verðandi hálfmaraþonhlaupari): "Já auðvitað"

**Handaband**

Elskulegu vinir .. ef að þið keyrið fram hjá mér og sjáið mig hlaupa þá bara endilega að skrúfa niður bílrúðuna og kalla einhver falleg vel valin orð að mér.

t.d : "Mikið skokkar þú fallega .. taktu sprettinn stelpa eða hlauptu eins og vindurinn"

"Ohhh hi Sarah .. "

2008-02-25T13:39:00.000Z

Mér finnst Jimmy Kimmel fyndinn
...

Fortíðarþrá ..

2008-02-22T16:51:00.000Z

Gallafatabarbí er að fara út,
Smart föt - fallegt hár.
..

Mig langaði svoo í þessa dúkku þegar ég var lítil, en þurfti að sætta mig við gömlu barbie dúkkurnar hennar Hildar systur, sem voru reyndar mjög flottar líka.

...

Ef þú átt leið um Strandgötuna að kvöldi til þá er ofsalega indælt að ganga fram hjá Sparisjóðnum Byr því þar er komin friðarsúla Hafnarfjarðar (eða friðarhús hfj.)

...

Talandi um strandgötuna þá er stórleikur þar í íþróttahúsinu á sunnudagskvöldið..

FH - Selfoss

kl: 1900

Ég ætla allavega að mæta.

Slagsmálahorn Þórunnar

2008-02-19T14:26:00.001Z

Ég er nú ekki mikið þekkt fyrir það að vera mikill slagmálahundur, en sjáið til elskunnar þá hef ég hef lent í ýmsu um ævina ... hef að vísu farið oft og mörgum sinnum upp á slysó en það tengist bara klaufaskap í sjálfri mér en ekki slagsmálum mínum.

Fyrir nokkrum árum stundaði ég nám í Engidalsskóla í Hafnarfirði sem ég unni ansi vel. Þegar ég var 6. ára lenti ég í mínum fyrsta slag og vann hann. Því miður fékk hinn aðilinn sár á bakið með því að fá stól í bakið en hann átti ekkert með það að gera að stríða Katrínu Diljá sessunauti mínum. Reyndar var þetta alveg óvart, ég var að toga í stólinn hennar Katrínar sem hann sagðist vera réttilegur eigandi að og bað ég hann vinsamlegast um að sleppa honum. Hann hafði greinilega ekki reiknað með því að ég væri svona sterk og þrjósk og endaði með því að drengurinn datt í gólfið og stóllinn fór í bakið á honum.

Var ansi hrædd við kauða eftir þennan atburð og passaði alltaf upp á að ég væri ekki ein í kringum hann og hafði alltaf einhverja lífverði nálægt mér.

Nokkrum árum síðar mætti ég heim úr skólanum og tjáði bróður mínum sem var að borða heilan brauðpoka og með súperdós sér við hlið það að ég hafði lamið xxxxx sem ég gerði náttúrulega alls ekki. Veit ekki alveg hvað ég var að pæla með því að ljúga að bróður mínum að ég hefði lent í slag og unnið by the way. Ég var rúmlega 137 cm að hæð og 20 kíló og átti að hafa unnið slag.

Ekki nóg með það, þá kom elskulega vinkona mín hún Sigurlaug í heimsókn sama dag og tók bróðir minn á móti henni og ákvað að spyrja hana út í slag dagsins. Ég var á klósettinu og heyrði hvað fór fram á milli þeirra. Haa ..? slagur ..? Nei það var enginn slagur í skólanum í dag.

O ó

Ætla ekki að fara nánar út í það hvað gerðist eftir þetta samtal en þessi orð hér fyrir neðan tengjast því sem fór fram:

kalt vatn - blaut föt - og kvikindislegur hlátur

Ég á enn eftir að hefna mín á Þórarni Bé.

**framhald síðar **